АҚШ билігі Украинаға көмектесуден бас тартқан Маскты тексеріп жатыр

АҚШ Сенаты жеке ғарыш компаниясының бас директоры Илон Маск Украина күштеріне Қырымдағы Ресей теңіз күштеріне шабуыл жасау үшін Starlink спутниктік байланыс желісін пайдалануға рұқсат бермеген соң SpaceX-ті тексергісі келеді. Бұл туралы АҚШ Қарулы күштер комитетінің мүшесі, демократ сенатор Элизабет Уоррен мәлімдеді.

«Конгресс мұнда не болғанын және бізде сыртқы саясатты миллиардер емес, үкімет басқаратын құралдар жеткілікті ме, жоқ па, соны қарастыруы керек», — деп келтіреді Уорреннің сөзін Bloomberg агенттігі.

Агенттіктің хабарлауынша, Маск 13 қыркүйекте Сенатта басқа да ірі технологиялық компаниялардың басшыларымен бірге жабық тыңдауларға қатысады.

Уоррен сонымен қатар Пентагонды SpaceX-пен келісім-шарттарын тексеруге шақырды. Оның ұстанымын Сенаттың Қарулы күштер комитетінің төрағасы, демократ Джек Рид қолдады. Ол қазіргі жағдайға алаңдаушылық білдірді және спутниктерді әдетте үкіметтер бақылайтынын және олардың жұмысы туралы шешімдерді президенттер қабылдайтынын атап өтті.

Украинаның Starlink қызметін пайдалануы

Украина Ресейдің соғыс қимылдары басталғаннан кейін бірден Starlink-ке қол жеткізді. The New York Times (NYT) хабарлауынша, 2023 жылдың шілдесіне дейін Киев 42 мыңнан астам Starlink терминалын алған.

Сенаторлардың наразылығын тудырған жағдай 2022 жылы болды. New York Times ақпарат көздеріне сілтеме жасай отырып, осы жағдайды жазды. Бұл факт 12 қыркүйекте жарияланған Илон Масктың өмірбаянында расталды.

Масктың өмірбаяншысы Уолтер Айзексонның айтуынша, украин сүңгуір қайықтары ресейлік кемелерге жақындаған кезде олармен байланыс үзіліп қалған. Кітапқа сәйкес, Маск Ресейдің ядролық қарумен жауап қайтаратынына алаңдап, «жоғары лауазымды ресейлік шенеуніктермен» сөйлескеннен кейін байланысты үзуге шешім қабылдаған.

Илон Масктың реакциясы

Биографқа берген сұхбатында Маск Starlink «соғыстарға қатысуға» арналмағанын, бейбітшілік қызметтерге, білім беру порталдарына қол жеткізу үшін шығарылғанын атаған.

Кәсіпкер Starlink байланысы Қырымға жақын жерде жұмыс істемейтінін, сондықтан оны өшіре алмайтынын айтты. Сонымен бірге миллиардер украин билігінің өтініші бойынша бұл ресейлік флотқа жасалған шабуыл екенін ескеріп, оны «Севастопольге барар жолда» бірден жарып жіберуге келіспейтінін мойындады. Егер мұны істемеген болса, ол Space X-ті соғыс пен қақтығысқа апарар еді, бұл кәсіпкердің ережелеріне қайшы келеді.

«Біздің қызмет көрсету шарттарымыз Starlink-ті шабуылдаушы әскери операциялар үшін пайдалануға анық тыйым салады, өйткені біз азаматтық жүйеміз, сондықтан Украина билігі басқа тыйым салынған нәрсені сұрады», — деп түсіндірді Маск.

Путин Масктың тамаша кәсіпкер екенін айтты

12 қыркүйекте Шығыс экономикалық форумының пленарлық отырысында сөйлеген сөзінде Ресей президенті Владимир Путин Илон Маскты тамаша тұлға, белсенді және дарынды бизнесмен деп атады.

«Жеке бизнеске келетін болсақ, Илон Маск сөзсіз тамаша адам. Белсенді, талантты кәсіпкер. Ол көптеген жұмыс атқаруда, соның ішінде Америка мемлекетінің қолдауымен», — деді Ресей президенті.

Сонымен бірге Илон Маск Америка Құрама Штаттарына деген адалдығын ерекше атап өтті.

«Мен АҚШ азаматымын, менде бір ғана төлқұжат бар. Не болса да мен Америка үшін күресіп, өлемін. АҚШ Конгресі Ресейге соғыс жариялаған жоқ. Мен сатқын деп жүргендердің өзі сатқындар», — деді SpaceX басшысы.