Әсет Ерғалиев Қазақстан президентінің кеңесшісі болып тағайындалды

Сонымен қатар, ол Стратегиялық жоспарлау және реформалар агенттігінің төрағасы қызметін де атқаратын болады. Бұл туралы Ақорда сайтында жарияланған ресми жарлықта айтылған.

39 жастағы Ерғалиев 2025 жылғы ақпаннан бері агенттікті қайтадан басқарып келеді. Ол бұған дейін Қазақстанның ұлттық экономика министрі, президенттің экономикалық мәселелер жөніндегі көмекшісі, премьер-министрдің кеңесшісі, сондай-ақ Қазақстанның Дүниежүзілік сауда ұйымы мен басқа халықаралық экономикалық ұйымдардағы тұрақты өкілі қызметтерін атқарған.

Әсет Ерғалиевтің мамандығы – экономист. Ол Қазақстан менеджмент, экономика және болжау институтын, Швециядағы Халықаралық бизнес мектебін тәмамдаған, сондай-ақ Ұлыбританиядағы Йорк және Ноттингем университеттерінде білім алған.

Айта кетейік, Ерғалиев агенттік төрағасы қызметіне алғаш рет 2022 жылғы қаңтарда тағайындалған.