Әскери бөлімдерге бейнекамералар орнатылады, сарбаздарға бейнежетондар тағылады

Қазақстан Қарулы Күштерінің әскери бөлімдеріне алдағы уақытта жасанды интеллектпен жабдықталған заманауи бейнебақылау жүйелері орнатылады. Бұл туралы Бас прокурор Берік Асылов өзінің Х (бұрынғы Twitter) әлеуметтік желісіндегі парақшасында мәлімдеді.

Бас әскери прокуратура Қарулы Күштер, басқа да әскерлер мен әскери құрылымдармен бірлесіп, екі жаңа жобаны жүзеге асыруда:

• «Әскердегі заң және тәртіп»;
•  «Цифрлық профилактика».

Бұл жобалар әскери қызметшілердің құқықтарын қорғауға, ашықтықты арттыруға және әскери ортада қауіпсіз әрі сенімді ахуал қалыптастыруға бағытталған.

Негізгі өзгерістер:

Бейнебақылау және жасанды интеллект, Әскери бөлімдерде заманауи IT-шешімдер негізінде бейнебақылау жүйелері орнатылады. Жасанды интеллект арқылы жүйе түрлі жағдайларды автоматты түрде сараптап, қауіпсіздікке қауіп төндіретін әрекеттерді алдын ала анықтай алады.

Бейнежетондар. Командирлер мен жауынгерлік кезекшілікте жүрген мерзімді қызметтегі сарбаздарға бейнежетондар (денеге тағылатын шағын камералар) беріледі. Бұл әсіресе жаттығулар мен атыс кезінде тәртіп пен қауіпсіздікті бақылауға көмектеседі.

Цифрлық кеңесші және байланыс арналары. Әскерилер мен олардың туыстары үшін armia.kz сайтында арнайы цифрлық кеңесші іске қосылды. Бұл кеңесші арқылы құқықтық кеңес алу, шағым қалдыру немесе ақпараттық қолдауға жүгіну мүмкіндігі қарастырылған. Сонымен қатар басқа да балама байланыс арналары іске қосылады.

«Ең алдымен әскери бөлімдерде заманауи IT-жүйелермен бейнебақылау орнатылады. Жасанды интеллект технологияларын енгізу арқылы жағдайды автоматты түрде талдап, жеке құрамның қауіпсіздік деңгейін арттыру көзделуде. Командирлерді (далалық жаттығуларда, атыс кезінде, оқу-жаттығуларда), қарауылдағы және жауынгерлік кезекшіліктегі мерзімді қызметтегі сарбаздарды бейнежетондармен жарақтандыру жоспарланып отыр», - деді Берік Асылов.

Жобалар кезең-кезеңімен жүзеге асады. Алғашқы пилоттық бөлімдерге жүйе осы жылдың соңына дейін енгізілуі мүмкін.