Астанадағы гимнаст қыздарға қатысты дау: Спорт министрлігі мәлімдеме жасады

Әлеуметтік желіде жарияланған үндеуде гимнаст қыздардың ата-аналары «Думан» залынан шығарылғаннан кейін балаларға жаттығатын орын жоқ екенін айтқан. Олардың сөзінше, елордада талапқа сай келетін басқа ғимарат жоқ.

Осы жағдайға байланысты министрлік  жаттығуды жалғастыруға болатын екі нысанды атаған:

«Сарыарқа» велотрегі (Астана Олимпиадалық даярлық орталығы) — түрлі спорт түрлері бойынша жаттығу өткізуге мүмкіндік беретін көпфункционалды спорт залдары бар;

Жақсылық Үшкемпіров атындағы жекпе-жек сарайы — заманауи спорт кешені, оқу-жаттығу сабақтарын өткізуге қойылатын талаптарға сай әмбебап залдар мен аренасы бар.

Министрлік мәліметінше, бұл нысандардың аумағы мен техникалық мүмкіндіктері жаттығу процесін ұйымдастыруға жеткілікті. Қажет болған жағдайда арнайы құрал-жабдықтармен жабдықтауға болады.

Алайда қазіргі сәтте гимнаст қыздарды нақты қайда орналастыру мәселесі шешілмеген. Комитет жергілікті атқарушы органдармен бірлесіп, спортшылардың жаттығу процесінің үздіксіздігін қамтамасыз ету бағытында жұмыс жүргізіп жатыр.

Еске сала кетейік, жеке «Izumrud» гимнастика мектебі мен №1 олимпиадалық резерв спорт мектебі бірнеше жыл бойы «Думан» спорт кешенінде жаттығып келген.

2025 жылдың шілде айында ғимаратты жаңа меншік иесі сатып алып, гимнаст қыздарға басқа орын іздеуді талап еткен.

2026 жылдың 1 наурызынан бастап «Думанда» жаттығу өткізілмейді. Осыған байланысты ата-аналар залды гимнаст қыздардың иелігінде қалдыруды сұрап, ашық үндеу жариялады.

Министрлік хабарлауынша, бұрынғы «Думан» қонақүй кешені орналасқан ғимарат жеке меншік нысан және мемлекеттік меншікке жатпайды.

2025 жылдың шілдесінде бұл нысанды «Отбасы банк» акционерлік қоғамы орталық аппаратын орналастыру үшін сатып алған.

Меншік құқығы тіркелген сәттен бастап, мүлікті иелену, пайдалану және оған билік ету мәселелері азаматтық заңнама нормаларымен реттеледі және тек меншік иесінің құзыретіне жатады.

Сондықтан Спорт және дене шынықтыру істері комитетінің бұл нысанға қатысты шешім қабылдауға немесе оның функционалдық мақсатын өзгертуге құқығы жоқ. Қолданыстағы заңнама жеке меншік иесінің шаруашылық қызметіне тікелей араласуға мүмкіндік бермейді.

Сонымен бірге ведомство жергілікті атқарушы органдармен бірлесіп, спортшыларды балама жаттығу базасымен қамтамасыз ету жұмыстарын жалғастырып жатқанын мәлімдеді.

Айта кетейік, «Думан» залында Қазақстанның көркем гимнастикадан ұлттық құрамасының мүшелері де жаттығып келген. Олар ел намысын халықаралық жарыстарда қорғап жүр.

«Izumrud» жеке мектебінің хабарлауынша, олар жаңа жаттығу орнын тапқан. Алайда бұл ғимаратты олимпиадалық резерв мектебімен бірге пайдалану мүмкін болмай отыр, себебі халықаралық деңгейдегі спортшыларды даярлау үшін төбесі биік зал қажет.