Атырау облысында жоғалған отбасының қызы бейнебақылау камераларына түскен

КТК телеарнасының тілшілері жоғалған отбасының ауылдастары және туыстарымен сөйлескен.

Ауылдастарының айтуынша, жоғалған отбасы ешкімге зияны жоқ, қарапайым адамдар болған.

«Өте жуас, адал еңбекпен күн көрген жандар. Екеуі де зейнеткер, балаларының екеуі де мүгедек. Көршілердің ешқайсысы күдікті ештеңе байқамаған. Туыстары полицияға арыз жазған соң ғана олардың жоғалғанын білдік. Қазір ешкім олар туралы ештеңе білмейді», — дейді көршісі Үсен Жолдасұлы.

Туыстары да бастапқыда жағдайдың қаншалықты күрделі екенін бірден аңғармаған. Себебі жоғалған отбасының ұлы біраз уақыт байланысқа шығып отырған.

«Кейбіреулер неге бірден іздемеді деп жазады. Бірақ жиеніміз Наурыз бізге WhatsApp арқылы хабарласып тұрды. Анасы ауырып қалғанын, сондықтан малын сатуға мәжбүр болғанын айтты. Ауылдастарға жазып, мал ұсынды. Бірақ ешқашан дауыс хабарлама жібермеді, видеоқоңырауға шықпады. Тек мәтінмен ғана жазды. “Мынадай мал бар, алып кетіңдер, ақша өте қажет” дейтін", - дейді туысы Шалқар Мұқанғалиев.

Үй иесінің қарындасы Фаризат Кенжеғалиева да бүкіл малдың бірден сатылуы күдік тудырғанын айтады.

«Ағам ешқашан ұзаққа кетпейтін, малды қараусыз қалдырмайтын. Қайда барса да алдын ала ескертетін. Мен 14 желтоқсанда бір күмәнді жағдай барын сездім. Ал оған дейін ештеңе білмедім, себебі ұлы анасын емдетуге алып кетті деп айтқан», - дейді ол.

6 қаңтар күні кешке полиция екі адамның мәйітін тапқаны белгілі болды. Олар үй маңындағы қорадан табылған, отбасы жоғалғаннан кейін екі ай өткен соң анықталған. Зейнеткерлердің екі баласын іздеу жұмыстары әлі жалғасып жатыр.

«Іздеу жұмыстары Шәдіман түбек, Бесмола, Бірмола аумақтарында 20 шақырым радиуста жүргізіліп жатыр. Сондай-ақ полицияның нұсқауымен Қарасу аумағы тексерілуде. Бұл жерлерде сүңгуірлер мен суасты дроны тартылған», - деді Атырау облысы ТЖД басқармасының бастығы Жантөре Демешов.

КТК мәліметінше, 5 қараша күні жоғалған отбасының тағы бір қызы таксимен үйден кеткен. Ол бөлек тұрған. Кейінірек ол Индер ауданындағы жанармай құю бекетінде бейнебақылау камераларына түсіп қалған. Ал зейнеткерлердің екінші қызы мен оның күйеуі Өзбекстанға елден шығып кеткені белгілі болды.

Еске салайық, бұл отбасы өткен жылдың қазан айында жоғалған. Туыстары полицияға 25 желтоқсанда арыз түсірген. Қазіргі таңда іс «Адам өлтіру» бабы бойынша тергеліп жатыр.