Атырау тұрғыны қолы мен аяғы жоғын "дәлелдей" алмай келеді

2010 жылғы 15 қараша күні ол жұмыстан қайтып келе жатып тепловоздың астына түсіп қалған. Дәрігерлер өмірін сақтап қалғанымен, оның бір қолы мен бір аяғын ампутациялауға тура келген. 

Алғашында оған тек екінші топ мүгедектігі берілді. Бірінші топқа шығу үшін төрт жыл бойы комиссиялардың табалдырығын тоздырған. Тек оны  суретке түсіріп, Астанаға жібергеннен кейін ғана мәселе бір аптада шешілген.

Қазір Мұханбеталиев тағы да сол жағдайға тап болып отыр. Бірінші топ мүгедектігі расталғанына қарамастан, комиссия оған электрлі арба беруден бас тартып келеді.

– Бір жарым жылдан бері кабинеттен кабинетке жүгіріп жүрмін. Поликлиникаға барамын, қайтадан кері қайтарып жібереді. Құжат дұрыс толтырылмаған деп сылтау айтады, бірақ олай емес. Травматолог тексерді, медкомиссиядан өттім – бірақ нәтиже жоқ. Шаршадым, – дейді ол.

Жақында оның мәселесін өзі қатыспаған отырыста қараған. Шешімде ол «денсаулығына байланысты қатыса алмады» деп жазылыпты. Бірақ Марат мырза мұнымен келіспейді:

– Мені ешкім шақырған жоқ. Денсаулығым бар, қатыса алатын едім. Еш хабар берместен өзімсіз шешім қабылдағандарына ашынам, – дейді ол.

Қарапайым көмек те жоқ

Марат Мұханбеталиевке электрлі арба түгілі, қарапайым күтім құралдары – памперс те берілмеген. Оларды тек астаналық құрылымдардың көмегімен алуға мүмкіндік болыпты.

Ведомство түсіндірмесінде мүгедектерді техникалық оңалту құралдарымен, соның ішінде электрлі арбамен қамтамасыз ету тек жеке оңалту бағдарламасы мен комиссия шешімі негізінде жүргізілетіні айтылды. Мұханбеталиевтің жағдайында электрлі арбаны пайдалануға медициналық қарсы көрсетілімдер анықталғандықтан, комиссия оны бермеу туралы шешім қабылдаған. Дегенмен, азаматтың бұл шешімге заң бойынша шағымдануға құқығы бар екені атап өтілді.

– Мен енді кабинеттен кабинетке жүгіре алмаймын. Қалай дәлелдеймін, қолым мен аяғым жоқ екенін? Міне… жоқ қой. Көрсін, – дейді жан айқайын жеткізген Мұханбеталиев.