«Атыраулық хакер» Түркияда алаяқтық ісі бойынша ұсталды

Басылымның мәліметінше, операцияны Интерпол қызметкерлері Самсун қаласында жүргізген. Бұған дейін полиция департаменті ер адамның бірнеше алаяқтық эпизоды бойынша күдікті ретінде қарастырылып жатқанын хабарлаған. Оған Қазақстан Республикасының Қылмыстық кодексінің 190-бабы («Алаяқтық») бойынша қылмыстық іс қозғалған.

Тергеу нұсқасына сәйкес, Құрманғазы ауданының тұрғыны инвестиция салуға көмектесу, IT саласында оқыту, аккаунттарды бұғаттан шығару, қаражатты шешуге жәрдемдесу және техника сату сияқты түрлі қызметтерді уәде етіп, адамдарды алдап, олардың ақшасын иемденген. Келтірілген жалпы шығын 13 миллион теңгеден асқан.

Қаңтар айында Атыраудың мамандандырылған тергеу соты күдіктіге қатысты сырттай қамауға алу түріндегі бұлтартпау шарасын таңдаған. Кейін ол халықаралық іздеуге жарияланған.

Прокуратураның мәліметінше, күдікті ақпан айында Самсун қаласында ұсталған. Қазіргі уақытта Қазақстанның Бас прокуратурасы оны елге қайтару (экстрадициялау) туралы сұрау дайындау үшін тиісті өтініш жолдаған.

Айта кетейік, ер адам бұған дейін әлеуметтік желілерде Атырау облысында бір отбасының жоғалып кетуі туралы резонансты жағдайдан кейін кеңінен танылды. Интернетте тараған видеоларда ол өзін «Атыраулық хакермін» деп таныстырып, оқиғаны өзі тергеп жатқанын айтып, болжамды геолокациялар мен телефон байланыстары туралы деректерді көрсеткен.

Бұл бейнероликтер Instagram желісінде тез таралып, қоғамда үлкен резонанс тудырған. Ер адам бұған дейін Қазақстаннан тыс жерде жүргенін, тіпті Дубай қаласында тұратынын да мәлімдеген.