Ауғанстанда жойқын жер сілкінісінен қаза тапқандардың саны 1400-ден асты

Ең ауыр жағдай Кунар провинциясында тіркелді. Ресми деректерге сәйкес, 3 мыңнан астам адам жарақат алған, ал қираған үйлердің саны 5 мыңнан асып отыр. Жергілікті билік қаза болғандар көрсеткіші әлі де өсуі мүмкін екенін айтады.

Халықаралық қауымдастық апат салдарын жоюға көмек беруге дайын екенін білдірді. Ұлыбритания 1 млн фунт стерлинг бөлуге уәде етті. Бұл қаражат тікелей «Талибанға» емес, серіктес ұйымдар арқылы жеткізілмек. Үндістан, Қытай және Швейцария да гуманитарлық көмек көрсетуге әзір екенін мәлімдеді.

БҰҰ да шұғыл түрде 5 млн доллар қаржы бөлді. 

Айта кетейік, 1 қыркүйекте Ауғанстанда жер сілкінді. Жер сілкінісі магнитудасы 6 балл болып, жергілікті уақытпен түн ортасына таяу Пәкістан шекарасына жақын Ауғанстанның шығысында тіркелген. Бастапқыда тек екі баланың қаза тауып, 15 адамның жараланғаны хабарланған еді. Енді қаза болғандар саны мыңнан асты.