Аустралиядағы қанды теракт: Сидней жағажайында тоғыз адам қаза тапты

Тағы 12 адам түрлі деңгейде жарақат алған, соның ішінде екі полиция қызметкері бар. Бұл туралы Жаңа Оңтүстік Уэльс штатының полициясы хабарлады .

Қарулы шабуыл қалай болды?

Оқиға 14 желтоқсан күні кешкі уақытта жағажайда адамдар көп жиналған сәтте болған. Полиция дерегінше, шабуылға екі қарулы адам қатысқан. Олардың бірі оқиға орнында атып өлтірілсе, екіншісі жараланып, ұсталған.

Куәгерлердің айтуынша, қарулы шабуылшылардың бірін полиция келмей тұрып, қарапайым әрі қарусыз азамат тоқтатқан. Ол күдіктінің қолындағы винтовканы тартып алып, шабуылды жалғастыруға мүмкіндік бермеген. Бұл оқиға желіде «ерлік» ретінде бағаланып жатыр .

Полиция мен қауіпсіздік шаралары

Шабуылдан кейін Бонди-Бич маңы толықтай қоршауға алынып, саперлер ықтимал қолдан жасалған жарылғыш заттарды іздеу үшін арнайы техника әкелді. Қауіпсіздік қызметтері бұл әрекетті алдын ала жоспарланған террористік акт болуы мүмкін деген нұсқамен тергеп жатыр .

Жаңа Оңтүстік Уэльс полициясы қазіргі таңда қаза тапқандар мен жараланғандардың аты-жөнін жарияламаған, тергеу мүддесіне байланысты қосымша ақпарат уақытша берілмейтінін мәлімдеді .

Ханука мерекесі нысанаға алынған ба?

Аустралиялық еврей қауымдастығының мәліметінше, шабуыл жасалған сәтте жағажайда еврейлердің Ханука мерекесіне арналған іс-шарасы өтіп жатқан. Осыған байланысты құқық қорғау органдары шабуылдың діни немесе этникалық өшпенділікке негізделген болуы мүмкін деген нұсқаны да қарастырып отыр .

The Insider басылымының хабарлауынша, шабуыл салдарынан раввин Эли Шленгер қаза тапқан, ал Израиль–Аустралия кеңесінің төрағасы Арсен Островский жараланған .

Билік пен халықаралық реакция

Аустралия премьер-министрі Энтони Албанезе бұл оқиғаны «ел тарихындағы ең сұмдық қылмыстардың бірі» деп атап, қаза тапқандардың отбасына көңіл айтты. Израиль, АҚШ және Еуроодақ елдерінің бірқатар ресми тұлғалары да терактіні қатаң айыптады.

Қазіргі уақытта полиция шабуылдаушылардың жеке басын, олардың ықтимал байланыстарын және радикал ұйымдармен қатысы бар-жоғын анықтап жатыр. Билік өкілдері терроризм бабы бойынша қылмыстық іс қозғалғанын растады.