Axios: Трамп Украина бойынша келіссөздерден шығу жолын ойлап жатыр

 Әйтпесе Вашингтон дипломатиялық жұмысын тоқтататынын ескертті, деп хабарлайды Axios дереккөздерге сүйеніп.

Трамптың айналасындағылар келіссөздерде ілгерілеудің жоқтығына Еуропаны айыптап отыр.

Порталдың жазуынша, Дональд Трамп Ресейдің Украинаға қарсы соғысын тоқтату мақсатындағы дипломатиялық бастамалардан бас тартуды байыппен қарастыруда.

«Біз әзірге бақылап отырамыз. Олар тағы біраз соғысып көрсін, не боларын көреміз», – деген Ақ үйдің жоғары лауазымды өкілі.

Axios атап өткендей, кейбір америкалық шенеуніктер Еуропа көшбасшыларын бейбіт процестегі «басты кедергі» ретінде көре бастаған. Ақ үйдегілердің пікірінше, бірқатар еуропалық лидерлер жария түрде Трамптың бітімгерлік бастамаларын қолдағанымен, жасырын түрде АҚШ пен Ресей президенттері – Трамп пен Владимир Путин – Аляскадағы саммитте бейресми жеткен прогресті жоққа шығаруға тырысып жатыр.

Ақ үй қызметкерлері Еуропаға деген «шыдамын жоғалтып бара жатқанын» ашық білдірген. Олардың айтуынша, еуропалықтар Украинаға «Ресейден шындыққа жанаспайтын аумақтық жеңілдіктерді талап етуге» итермелеуде.

«Еуропа бұл соғысты соза алмайды әрі орынсыз үмітті көлеңкеде қолдап, шығынды АҚШ көтереді деп сенбеуі керек», – деген Ақ үй өкілі. Оның сөзінше, егер Еуропа «соғыстың ушығуын қаласа, бұл – оның таңдауы, бірақ ол жеңістің орнына шарасыз жеңіліске тап болады».