Axios: Зеленский соғысты жыл соңына дейін аяқтауға үмітті

Бұл туралы 26 ақпан, бейсенбі күні Axios басылымы украиналық шенеунік пен әңгіме мазмұнынан хабардар тағы екі дереккөзге сілтеме жасап жазды. Басылым мәліметінше, үш дереккөз де президенттердің әңгімесін жақсы деп бағалаған.

Дереккөздердің бірінің айтуынша, әңгіме барысында Зеленский Украинадағы соғыс 2026 жылы аяқталады деген үмітін білдірген. Бұған жауап ретінде Трамп соғыстың тым ұзаққа созылғанын айтып, оны бір ай ішінде тоқтатқысы келетінін жеткізген.

Мәліметтерге сәйкес, телефон арқылы сөйлесу кезінде Зеленский Трампқа Украинаға көрсетіп жатқан көмегі үшін алғыс білдіріп, тек АҚШ президенті ғана Владимир Путинді соғысты тоқтатуға мәжбүрлей алатынын айтқан. Трамп өз кезегінде Ресеймен ықтимал бейбіт келісім аясында Украинаға АҚШ тарапынан елеулі қауіпсіздік кепілдіктерін беруге дайын екенін растаған.

Бұған дейін хабарланғандай, 25 ақпандағы телефон әңгімесінде АҚШ, Украина және Ресей арасындағы келіссөздер үдерісі де талқыланған. «Женевада өкілдеріміз екіжақты кездесуде қаралатын мәселелерді, сондай-ақ келіссөз топтарының келесі кездесуіне дайындықты талқылады — үшжақты форматтағы толық құрамдағы келесі кездесу наурыз айының басында өтеді», — деп жазды Зеленский сол күні кешке өзінің Telegram арнасында.

Зеленскийдің айтуынша, Украина мен Ресей арасындағы келесі кездесу «көшбасшылар деңгейіндегі келіссөздерге көшуге мүмкіндік береді» деп үміттенеді және Трамп та мұндай қадамдардың реттілігін қолдайды.

Бұл 30 минуттық әңгіме АҚШ пен Украина президенттерінің қаңтар айының соңында Давоста өткен кездесуінен кейінгі алғашқы байланыс болды.

Женевада 26 ақпанда АҚШ пен Украина делегацияларының жаңа келіссөз раунды басталды. Украина делегациясын Ұлттық қауіпсіздік және қорғаныс кеңесінің хатшысы Рустем Умеров, ал АҚШ делегациясын президенттің арнайы өкілі Стивен Уиткофф және Трамптың күйеу баласы Джаред Кушнер бастап баруда.

Вашингтон Украинадағы соғысты маусым айына дейін аяқтауды көздейді. Бұл туралы Зеленский 7 ақпанда БАҚ-пен кездесуде айтқан. Оның сөзінше, америкалықтар тараптарға соғысты жаздың басына дейін аяқтауды ұсынып отыр және дәл осындай кесте бойынша қысым көрсетуі мүмкін.

Сонымен қатар Зеленский соғысты маусымға дейін аяқтау жоспары іске аспаса да, Вашингтон келіссөздерден шығып кетеді деп күтпейтінін мәлімдеген.

Ақ үй ұсынған жоспарды Киев пен Мәскеу қабылдамаса, АҚШ Украинадағы бейбітшілік жөніндегі келіссөздерден шығуы мүмкін екенін 2025 жылғы сәуірдің соңында АҚШ вице-президенті Джей Ди Вэнс мәлімдеген. Оның айтуынша, «не келісімге келу керек, не АҚШ бұл процестен шығады», сондай-ақ «аумақтық ымыралар қажет». Вэнстің сөзінше, Украина да, Ресей де қазіргі бақылауындағы аумақтардың бір бөлігінен бас тартуға мәжбүр болуы ықтимал.