Аягөзде менингиттен көз жұмған сарбаз ісі: госпиталь дәрігері сотталды

Солтүстік Қазақстан облысынан 2025 жылғы 25 сәуірде әскерге шақырылған сарбаз 16 мамырда Аягөз әскери госпиталіне денсаулығының нашарлауына және дене қызуының көтерілуіне байланысты жеткізілген.

Алғашқы тексерістен кейін оған ем тағайындалған. Алайда жағдайы жақсарудың орнына нашарлаған.

Кейін ол аудандық орталық ауруханаға ауыстырылып, 19 мамыр күні жансақтау бөлімінде көз жұмды. 20 жастағы әскери қызметкердің өлімі бойынша сотқа дейінгі тергеу басталған.

Сот не анықтады?

Айыпталушы – 38 жастағы әскери госпитальдің емхана бөлімінің басшысы. Ол Қылмыстық кодекстің 317-бабы 3-бөлігі («Медицина қызметкерінің кәсіби міндеттерін тиісінше орындамауы, абайсызда адам өліміне әкелу») бойынша айыпталды.

Іс материалдарына сәйкес:

• дәрігер сарбаздың жағдайының ауырлығын дұрыс бағаламаған;

• диагнозды қате қойған;

• уақытында профильдік стационарға жібермеген;

• емдеу тактикасын өзгертпеген.

Сараптама қорытындысы

Сот-медициналық сараптама өлімнің себебі:

• іріңді менингит;

• ми ісінуі;

• сепсис;

• бүйректің токсикалық зақымдануы екенін көрсетті.

Сарапшылардың пікірінше, егер 16 мамырда дұрыс диагноз қойылып, уақытылы ем басталса, сарбазды аман алып қалуға болатын еді.

Туыстары не айтты?

Марқұмның ата-анасы оның әскерге дейін толық медициналық тексеруден өтпегенін мәлімдеді.

Олардың айтуынша, 2025 жылғы 22 сәуірде әскери комиссариат қызметкерлері шақыру қағазын жеткізіп, келмесе айыппұл болатынын ескерткен. Келесі күні жас жігіт бірден әскерге жөнелтілген.

Сот шешімі

Семей гарнизонының әскери соты дәрігерді кінәлі деп танып:

• 2 жылға бас бостандығынан айырды;

• осы мерзімге медициналық қызметпен айналысу құқығынан айырды.

Алайда ол амнистияға ілігіп, жазадан босатылды.

Сонымен қатар сот жәбірленуші тараптың талабын ішінара қанағаттандырып, 12 млн теңгеден астам көлемде моральдық және материалдық шығын өндіруді міндеттеді.

Айта кетейік, ұқсас оқиға Шымкент қаласында да тіркелген. 2026 жылдың қаңтарында мерзімді әскери қызметші кенеттен қайтыс болған. Алдын ала диагноз – жедел лейкоз.

Бұл дерек бойынша да қылмыстық іс қозғалған.