Жазылу
Азиядағы «Рагаса» тайфуны салдарынан ондаған адам қаза тапты
Азия елдерінде «Рагаса» супертайфуны кемінде 20 адамның өмірін қиды, ондаған тұрғын із-түзсіз жоғалып кетті. Қатты дауыл Қытайдың оңтүстігіне қарай жылжып, Гонконг халықаралық әуежайының жұмысын толық тоқтатты.
Тайваньдағы жағдай
24 қыркүйек таңындағы ресми мәліметке сәйкес, Тайваньда 14 адам қаза тапты, 30-дан астамы жараланды. Хуалянь уезінде су қоймасынан тасып шыққан су бірнеше ауылды басып, 124 адам із-түзсіз жоғалғандар қатарында тіркелген.
Филиппиндердегі шығын
«Рагаса» бұған дейін Филиппиндерге соққан еді. Мұнда кемінде 6 адам қаза тапты, тағы төртеуі іздестірілуде. Табиғи апаттың әсерін 190 мыңнан астам адам сезінді. Сонымен қатар, метеорологтар бейсенбі күні архипелагқа «Буалой» атты жаңа циклон соғуы мүмкін екенін ескертті.
23 қыркүйек түнінде «Рагаса» Лусон бұғазынан өтіп, Тайвань мен Филиппиннің солтүстігіне жетті. Желдің екпіні 200 км/сағ асқан. Жағалау аймақтарын теңіз толқыны шайып, көптеген аумақты су басты. Синоптиктер дауылдың 24 қыркүйек күні Қытайдың оңтүстігіне жететінін, бірақ күші бір деңгейге әлсірейтінін болжады.
Гонконгтағы шаралар
Гонконгта қоғамдық өмір толық тоқтады. Халықаралық әуежайда жүздеген рейс кейінге қалдырылды, жолаушыларға билеттерін тегін қайта рәсімдеуге мүмкіндік берілді. Қалада тұрғындар дүкендердің әйнектерін, сауда қатарларын қоршаумен бекітіп жатыр. Билік тайфун қаупінің ең жоғары – оныншы деңгейін жариялады.
Гуандун провинциясында мектептер уақытша жабылды, қоғамдық көліктердің қозғалысы мен жол құрылыстары тоқтатылды.
