БАӘ, Кувейт және Сауд Арабиясы тағы да Иран шабуылына ұшырады

АҚШ пен Израильдің Иранға қарсы соғысы басталғанына бес апта болғанда, Ислам Республикасы Парсы шығанағы аймағындағы көрші елдерге шабуылдарын жалғастыруда. Атап айтқанда, Біріккен Араб Әмірліктерінің астанасы Әбу-Дабиде өнеркәсіптік нысанға жасалған шабуылдан кейін бір адам снарядтың сынықтарынан жарақат алған. Бұл туралы Әбу-Даби үкіметінің баспасөз қызметі хабарлады.

Әл-Фуджейра порт қаласында, мемлекеттік WAM агенттігінің мәліметінше, телекоммуникация компаниясының ғимараты дрон шабуылына ұшыраған, зардап шеккендер жоқ. БАӘ Қорғаныс министрлігінің хабарлауынша, 6 сәуір күні 12 баллистикалық зымыран, екі қанатты зымыран және 19 дрон қағып түсірілген. Осы шабуылдардың салдарынан төрт адам жараланған.

Кувейттің солтүстігінде, Денсаулық сақтау министрлігінің мәліметінше, Ираннан ұшырылған зымырандар тойтарылғанымен, олардың сынықтарынан алты адам жарақат алған. Иордания билігі де шабуылдарға байланысты тоғыз оқиға тіркелгенін хабарлады: елдің қарулы күштері үш ирандық дронның екеуін атып түсірген, екі адам жараланған.

Ар-Риядта да Иран тарапынан жасалған шабуылдар туралы хабарланды. Елдің Қорғаныс министрлігі 6 сәуір күні таңертең дронның атып түсірілгенін мәлімдеді. Олардың қайда құлағаны нақтыланбады.

Сонымен қатар, Грекия Қорғаныс министрлігінің мәліметінше, оның Patriot зениттік-зымыран кешені Қызыл теңіз жағалауындағы Янбу-әл-Бахр порт қаласы маңында ирандық дронды атып түсірген. Бұл туралы dpa агенттігі хабарлады. Аталған әуе қорғаныс жүйесінің бұл аймақта орналасуы Грекия мен Сауд Арабиясы арасында 2021 жылы жасалған екіжақты келісімге байланысты екені айтылды.

Осы уақытта Ислам Республикасының газ нысандары, соның ішінде Парсы шығанағындағы объектілер де АҚШ пен Израильдің кезекті соққыларына ұшырады. Бұл туралы 6 сәуір күні Иранның Fars агенттігі хабарлады. Мәліметке сәйкес, Иран газ өнеркәсібінің орталығы саналатын Ассалуя индустриялық аймағындағы мұнай өңдеу зауыты маңында бірнеше жарылыс болған.

Бұған дейін сол күні Израиль қорғаныс министрі Исраэль Кац ел армиясы Иранның оңтүстігіндегі Ассалуя қаласында орналасқан ең ірі мұнай-химия кешеніне қуатты соққы жасағанын мәлімдеген еді. Оның айтуынша, бұл нысан Иранның мұнай-химия өнімдерінің шамамен жартысын өндіреді.

Иран мен АҚШ үкіметтері өкілдері әскери қақтығысты тоқтату жоспарын қабылдауы мүмкін еді, ол тіпті 6 сәуірдің өзінде күшіне еніп, Ормуз бұғазындағы блокаданы алып тастауы тиіс болған. Бұл туралы Reuters агенттігі «Исламабад келісімі» деп аталып жатқан жоспардың мазмұнынан хабардар, аты-жөні белгісіз дереккөзге сілтеме жасап хабарлады.

Дереккөздің айтуынша, негізгі келісім Пәкістан тарапы әзірлеп, Иран мен АҚШ өкілдеріне ұсынылған. Ол екі кезеңнен тұрады: алдымен дереу атысты тоқтату, кейін кең ауқымды келісімге келу. Алайда ресми Вашингтон мен Тегеран бұл ақпаратқа түсініктеме бермеді. Сонымен қатар, Reuters мәліметінше, Иран уақытша бітім емес, соғысты толық аяқтауды көздейтін ұсыныс жасаған.