Украина делегациясы АҚШ-қа Трамптың бейбіт жоспарын талқылауға аттанды —БАҚ

Бұл туралы Bloomberg және AFP дереккөздеріне сүйеніп хабарлады. Кездесулер осы апта соңында Флоридада өтуі мүмкін.

Кімдер барады?

Bloomberg мәліметінше, Украина делегациясының құрамында:

Украина Ұлттық қауіпсіздік кеңесінің басшысы Рустем Умеров, Украина Сыртқы істер министрінің бірінші орынбасары Сергей Кислица бар. Олар АҚШ президентінің арнайы өкілі Стивен Уиткоффпен және президент Дональд Трамптың кеңесшісі Джаред Кушнермен кездеседі.

AFP ақпаратына қарағанда, делегация құрамында болуы тиіс болған президент офисінің басшысы Андрей Ермак отставкаға кеткендіктен, сапарға қатыспайды.

Вашингтоннан кейін — Мәскеу

Мәліметтерге қарағанда, Украина делегациясының АҚШ-қа сапары Ресейге Трамп жоспарының жаңартылған нұсқасын жеткізуден бұрын жасалып отыр. Бұған дейін Дональд Трамп:

Уиткофф Мәскеуге Украина және АҚШ арасындағы Женевадағы келіссөздерден кейін түзетілген жоспарды апаратынын айтқан еді.

Ресей президенті Владимир Путин де 26 қарашада:

АҚШ делегациясы желтоқсанның басында Мәскеуге келетінін растады.

Ресей жағынан келіссөздерге Владимир Мединский, президент көмекшісі Юрий Ушаков және СІМ өкілдері қатысады.

Путиннің айтуынша, Ресей «АҚШ президенті мақұлдаған соғысты тоқтату жоспарын» болашақ келісімдер негізі ретінде қарастыруға дайын, бірақ «қорытынды нұсқалар туралы айтуға әлі ерте».

CNN: Киев пен Вашингтон кемінде үш тармақта келісе алмай отыр

АҚШ және Украина делегациялары Женевадағы алғашқы келіссөздерде Трамп жоспарының бастапқы мәтініне бірқатар өзгерістер енгізген. Алайда CNN дерегінше, Киев пен Вашингтонның позициясы төмендегі үш негізгі мәселе бойынша қабыспай тұр:

1. Донбастағы бірнеше стратегиялық аумақтың Ресей бақылауына өтуі мүмкіндігі;

2. Украина Қарулы күштерінің санын шектеу туралы тармақ;

3. Украинаның НАТО-ға кіру перспективасы.

Бұл туралы телеарнаға жоғары лауазымды украин шенеунігі хабарлаған.

Киевтің ұстанымы өзгермейді: «Оккупацияланған аумақтар берілмейді»

Бір күн бұрын Андрей Ермак мәлімдеме жасап:

«Зеленский Украина президенті болып тұрған кезде, Ресейдің басып алған аймақтарын мойындауға ешкім үміттенбесін. Конституция оған тыйым салады», - деген болатын.