Бас прокуратура Алматы облысы әкімдігінің заң бұзушылықтарын растады

Бұл туралы «Ауыл» ХДП депутаты Ирина Смирнованың депутаттық сауалына берген ресми жауабында хабарланды. Әңгіме денсаулық сақтау саласындағы ірі инвестициялық жобаны жүзеге асырып жатқан International Academy of Medicine and Sciences компаниясына қатысты болып отыр.

Бас прокуратураның мәліметінше, облыстық Денсаулық сақтау басқармасының лауазымды тұлғалары жеке әріптестің жұмысына заңсыз араласып, жобаның жүзеге асуына кедергілер жасаған. Олардың әрекеттеріне инфекциялық корпус құрылысының балансқа алынбауы, инженерлік желілердің қосылмауы, заңсыз кадрлық ротациялар және МЖӘ келісімшартын мерзімінен бұрын бұзу әрекеттері жатады.

«Кәсіпкерлік қызметке кедергі келтіру фактілері анықталды. Осы факті бойынша Қылмыстық кодекстің 365-бабы 3-бөлігі 2-тармағы (ауыр зардаптарға әкеп соққан өкілеттікті асыра пайдалану) бойынша сотқа дейінгі тергеу тіркелді», — делінген Бас прокуратураның ресми жауабында.

Аталған компания 2023 жылы Астана халықаралық қаржы орталығы (АХҚО) жанындағы халықаралық сотта жеңіп шығып, әкімдік 369,9 млн теңге өтемақы төлеуге міндеттелген болатын. Қазіргі таңда инвестор 13 млрд теңгеден астам сомаға қосымша талап-арыз түсірген.

Соған қарамастан, 2025 жылдың наурызына дейін әкімдік өз міндеттемелерін толық орындамаған. Құрылыс толық аяқталғанымен, нысан балансқа алынбаған, инженерлік инфрақұрылымға қосылмаған, ал келісімшарт талаптары тәуелсіз техникалық сараптамамен расталған.

Қақтығыстың басталуы және әкімнің рөлі

Бас прокуратура бұл даудың Алматы облысының әкімі Марат Сұлтанғазиев тағайындалғаннан кейін басталғанын айтады. Атап айтқанда, 2022 жылғы тамызда әкімнің тапсырмасымен инвестордың қаржы-шаруашылық қызметіне тексеру жүргізілген. Сонымен қатар, Денсаулық сақтау басқармасы жеке серіктестің қызметкерлеріне шартсыз түрде еңбек шарты мен функционалдық міндеттерін бекітуге тырысқан.

Жоба алғаш рет 2020 жылы мақұлданған және 5,5 млрд теңге инвестиция тартуды көздеген. Қазіргі таңда инвестор тарапынан 4,4 млрд теңгеден астам қаржы игерілген. Оған аурухана қарыздарын өтеу, инфекциялық корпустың құрылысы және медициналық жабдықтарды сатып алу кірген.

Енді Бас прокуратура ресми түрде заң бұзушылықтарды мойындап, қылмыстық іс қозғалғанын растады. Сонымен қатар, Алматы облысының әкімдігіне келісімшарт бойынша өз міндеттемелерін орындап, қақтығысты бейбіт түрде шешуді ұсынды.

Айта кетейік, бұл туралы Jas Alash көлемді мақала дайындаған болаты. Оны мына сілтеме арқылы оқи аласыздар.