Батыс жартышар АҚШ-қа тиесілі – АҚШ Мемлекеттік департаменті

«Бұл біздің жартышарымыз, және президент Дональд Трамп еліміздің қауіпсіздігіне қатер төнуіне жол бермейді», - делінген ведомство хабарламасында.

АҚШ мемлекеттік хатшысы Марко Рубио бұл ұстанымды қуаттап, ABC News арнасына берген сұхбатында:

«Бұл Батыс жартышар. Біз осы жерде өмір сүреміз және оны АҚШ-тың қарсыластары, бәсекелестері немесе дұшпандарына операциялық базаға айналдыруға жол бермейміз», - деді.

Мақалада атап өтілгендей, президент Трамп бұған дейін Колумбияға қатаң ескерту жасап, елді Венесуэламен бірдей тағдыр күтуі мүмкін екенін айтқан. Кубаны «құлдырауға дайын» деп атаған ол, келесі бағыт Мексика болуы мүмкін екенін де мәлімдеген. Ақ үй әкімшілігі мұны есірткі картельдеріне қарсы күресті жалғастыру қажеттілігімен түсіндіреді.

Сарапшылар бұл саясатты «Донро доктринасы» деп атап жүр. Бұл атау Дональд Трамп есімі мен XIX ғасырда АҚШ президенті Джеймс Монро ұсынған «Монро доктринасының» қосындысынан құралған. Тарихи доктрина Еуропа державаларын Америка құрлығын отарлаудан сақтандыруды көздеген болатын.

2025 жылдың қарашасында Трамп әкімшілігі ұлттық қауіпсіздік стратегиясын жариялап, онда Батыс жартышарға қатысты саясат Монро доктринасының қағидаттары негізінде құрылатыны көрсетілді.

Құжатта:

«Көпжылдықтан кейін АҚШ Батыс жартышардағы өз үстемдігін қалпына келтіру үшін Монро доктринасын қайта қолданады. Бұл отанымызды қорғау және аймақтың стратегиялық маңызды нысандарына қолжетімділікті қамтамасыз ету үшін қажет», - деп жазылған.

Сондай-ақ стратегияда АҚШ-тан тыс елдердің Батыс жартышарда әскери күштер орналастыруына немесе стратегиялық объектілерді бақылауына жол берілмейтіні қатаң атап өтілген.

Бұған дейін АҚШ-тың Венесуэлаға қатысты жоспарлары, сайлау өткізу, америкалық мұнай компанияларының мүмкіндіктері және Конгрестің ықтимал рөлі туралы мәліметтер жарияланған еді.