Бауыржан Байбектің есімі Қоспаев ісінде аталды

Бұл туралы Nege.Aqsha telegram-арнасы хабарлады.

Үш нысан төмен бағамен сатылған

Тергеу материалдарына сәйкес, 2019 жылдың сәуірі мен 2020 жылдың желтоқсаны аралығында Елдос Қоспаевтың ұйымдасқан қылмыстық тобы ТОО AV-Construction атынан Қыдырғали Байбекке Алматы қаласындағы Қаппаров көшесінде орналасқан үш нысанды нарықтық бағадан төмен бағамен сатқан.

– Объектілерді Қоспаевтың тапсырмасымен Абижанов, Танашев және Бабаев есімді тұлғалар Қыдырғали Байбекке заңды иелерінің мүддесіне қайшы, құрылыс құнынан төмен бағада рәсімдеген, – делінген құжатта.

Нақтырақ айтқанда:

• 114,7 м² пәтер – 43,5 млн теңгеге,

• екі коммерциялық нысан (220 м²) – 50,2 млн және 40,4 млн теңгеге сатылған.

Баға 1 шаршы метрге 230–425 мың теңге аралығында белгіленген, бұл құрылыс шығындарынан айтарлықтай төмен.

Қыдырғали Байбек пен «BN Invest» арасындағы байланыс

Қыдырғали Байбек – Қазақстанның экс- президенті Нұрсұлтан Назарбаевпен бірге оқыған тұлға. Ал Елдос Қоспаев істегі деректерде марқұм Болат Назарбаевтың «оң қолы» деп жазылған. Тергеу органдарының мәліметінше, Қоспаев Болат Назарбаевтың атын өзгелерді қорқыту, қысым жасау  мақсатында пайдаланған.

«2016 жылдан бастап Қоспаев Болат Назарбаевпен жақындығын пайдаланып, оның атын өзінің жеке пайдасы үшін пайдаланып келген», – делінген сот үкімінде.

Қоспаевтың қылмыстық тобы немен айналысты?

2024 жылғы 28 қаңтарда Астана қаласындағы арнайы қылмыстық істер жөніндегі сот Қоспаев басқарған ұйымдасқан топтың 11 мүшесіне үкім шығарды.

Іс материалына сәйкес, топ:

• рейдерлік жолмен бизнес тартып алу,

• алаяқтық,

• бопсалау,

• қылмыстық табысты заңдастыру,

• заңсыз кәсіпкерлікпен айналысу секілді ауыр қылмыстармен айналысқан.

Көптеген кәсіпкер осы топтың қысымына ұшырап, мүлкін немесе бизнесіндегі үлесін беруге мәжбүр болған.

Тергеу ісі 508 томнан тұрған, ал дәлелдер арасында 8 терабайттық бейне және аудио жазбалар, сондай-ақ көлемді материалдық айғақтар бар.