BBC редакторы: Украинадағы соғыс жақын арада аяқталмайды

"Ресей мен Америка шенеуніктері келіссөздер жүргізіп жатыр, ал еуропалық көшбасшылар мен дипломаттар АҚШ президенті Дональд Трамптың ультиматумдарымен күресіп әлек"-деп жазады редактор.

"Сумы - күндізгі уақытта тіршілігі қайнаған қала. Дүкендер ашық, азық-түлік мол. Бірақ қараңғы түсе салысымен көшелер қаңырап бос қалады. Әуе шабуылының сиреналары жиі естіледі.

Зениттік зеңбіректер қалаға жақын маңдағы шекараны кесіп өтіп, Украинаның қойнауындағы нысандарға шабуыл жасау үшін ұшырылған Ресей дрондарының ағынына қарсы бірнеше сағат бойы аспанға оқ жаудырады.

Мына көпқабатты үйдің үш қабаты тұтас опырылған. Осыдан екі апта бұрын ресейлік ұшқышсыз дронның шабуылынан 11 адам қаза тапты. Үйдің тұрғындары эвакуацияланды. Инженерлер зақым соншалықты ауыр болғандықтан, ғимарат құлап кетуі мүмкін деп қорқады.

Бұл үй Кеңес Одағы кезінде салынған ұқсас ғимараттардың тұрғын алабының бір бөлігі ғана. Оған қатарлас орналасқан көрші үйлердің тұрғындары күнделікті істерімен айналысып жүр.

Жасы 50-ге таяп қалған Николай кішкентай ұлымен үйіне қарай жаяу келе жатыр. Ол орыс әскерлері қиратып кеткен үйдің жанында тұрады.

Мен одан Дональд Трамптың Украинаға қатысты идеялары туралы не ойлайтынын сұрадым.

«Бізге бейбітшілік керек», - деді ол. – Бұл қажет, өйткені соғыстың мәні жоқ. Соғыс ештеңеге әкелмейді. Осы уақытқа дейін Ресей қанша аумақты басып алғанын қарасаңыз, Киевке жету үшін олар тағы 14 жыл соғысуы керек. Қарапайым халық қиналып жатыр. Бұл аяқталуы керек».

Бірақ егер Путин мен Трамп Зеленскийсіз және еуропалықтарсыз келіссөз жүргізсе, лайықты мәміле болмайды, деп есептейді Николай.

Редактор материалының тағы бір кейіпкері 33 жастағы Юлия.

"Ол осы ауданның тағы бір тұрғыны көрші үйге шабуыл жасаған кезде пәтерінде болған. "Оқиға түн ортасынан аса, біз ұйықтауға дайындалып жатқанда болды. Қатты жарылыс естідік және терезеден үлкен қызыл жарқылды көрдік. Қорқынышты еді. «Бұл өте қорқынышты болды», - дейді ол. «Бейбітшілік олар мұны тоқтатқаннан кейін ғана салтанат құрады. Бұл қадам олардың тарапынан болуы керек, өйткені олар бұл қорқынышты бастады ».«Әрине, Путинге сенуге болмайды», - деп түйіндеді Юлия.

Күн батып бара жатқанда кеңес әскерінде 30 жыл қызмет еткен отставкадағы полковник, жасы 70-ке келген, десе де әлі сергек Борис көлігіне жақындады. Оның айтуынша, ұлы мен немересі Украина үшін майданда соғысуда.

«Бейбітшілік болуы мүмкін», - дейді Борис. - Бірақ мен бұған сенбеймін. Менің ойымша, әділдік жеңеді. Бірақ біз сақ болуымыз керек».

«Путин тұрғанда, орыстарға сенуге болмайды. Өйткені олар оған Құдайдай сенеді. Оларды өзгерту мүмкін емес. «Бұл уақытты қажет етеді», - деп жалғастырды ол.

"Владимир Путин Украинаның егемендігін жойып, оны тәуелсіз мемлекет ретінде өмір сүру мүмкіндігінен айырғысы келетінін ашық айтты.

Владимир Зеленский Трамппен келіссөз үстелінде отырсын, отырмасын оған келіспейді. Тұрақты бейбітшілікке қол жеткізу, егер, әрине, ол мүмкін болса, ұзақ және баяу процесс болады.

Егер Дональд Трамп бейбіт келісімнен пайда тапқысы келсе, ол шешімді басқа жақтан іздеуі керек" -деп жазды Джереми Боуэн.