Бердымұхамедов бірқатар жоғары лауазымды шенеуніктерді қызметінен босатты

Бұл туралы «Компромат Центральная Азия» жазды.

Өзгерістер күштік құрылымдарды, Министрлер кабинетін, мемлекеттік концерндерді және аймақтық билік органдарын қамтыды.

Ұлттық қауіпсіздік министрі қызметінен Назар Атагараев босатылды. Оның орнына бұған дейін Президенттің қауіпсіздік қызметін басқарған, 2010 жылдан бері осы құрылымда жұмыс істеп келе жатқан Довлетгельды Мередов тағайындалды.

Сондай-ақ президенттің мұнай-газ саласы бойынша кеңесшісі Ашырулы Беглиев, вице-премьерлер Батыр Аманов пен Байрамгүл Ораздурдыева, көлік-коммуникация кешені бойынша үкімет төрағасының орынбасары Мамметхан Чакиев және денсаулық сақтау және фармацевтика өнеркәсібі министрі Мырат Маммедов қызметтен кетті.

«Туркменнебит» мемлекеттік концернінің басшысы Гуванч Агажанов үкімет төрағасының орынбасары болып тағайындалды. Сонымен қатар елде Автомобиль жолдары жөніндегі мемлекеттік агенттік негізінде Автомобиль жолдары министрлігі құрылды. Жаңа ведомствоны Хангелди Керимов басқарды.

Кадрлық өзгерістер өңірлерге де әсер етті: Түрікменбашы, Түрікменабат, Мары қалаларының және бірқатар аудандардың әкімдері (хякимдері) ауыстырылды. Бақылаушылардың мәліметінше, кейбір әкімдердің қызметтен кетуі сыбайлас жемқорлыққа қарсы саясатпен байланысты.

Сарапшылар әсіресе мұнай-газ секторындағы өзгерістерге назар аударуда. Жоспардың артығымен орындалғаны туралы есептерге қарамастан, 2025 жылдың қорытындысы бойынша газ өндіру көлемі 76,5 млрд текше метрді құрап, алдыңғы жылғы 77,6 млрд текше метр көрсеткіштен төмен болған.

Назар Атагараев Ұлттық қауіпсіздік министрлігін 2023 жылдан бері басқарған. Дереккөздердің айтуынша, оның негізгі міндеттерінің бірі Иран және Ауғанстанмен шекара қауіпсіздігін қамтамасыз ету болған. Сонымен қатар бақылаушылар Түрікменстанның күштік блогында елдің тұңғыш президенті Гурбангулы Бердымұхамедовтің ықпалы дәстүрлі түрде сақталып отырғанын атап өтеді.