Билл Клинтон Эпштейн ісі бойынша Конгресс алдында сөз сөйледі

Кездесу жабық форматта өткен. Алайда Клинтон өзінің кіріспе мәлімдемесінің мәтінін жариялады. Онда ол Эпштейннің қылмыстары туралы ештеңе білмегенін айтқан.

 «Мен не көргенімді білемін, одан да маңыздысы — нені көрмегенімді білемін. Мен не істегенімді білемін, одан да маңыздысы — не істемегенімді білемін. Мен ештеңе көрген жоқпын және ешқандай жаман іс жасаған жоқпын», — делінген мәлімдемеде.

Reuters агенттігінің хабарлауынша, Клинтон 2000-жылдардың басында, президенттік қызметінен кеткеннен кейін және Эпштейн 2008 жылы кәмелетке толмаған қызды жезөкшелікке тартқаны үшін сотталғанға дейін, оның ұшағымен бірнеше рет ұшқан. АҚШ Әділет министрлігі жариялаған құжаттардың арасында Клинтонның жүздері жасырылған әйелдермен түскен фотосуреттері де бар.

 «Зорлық-зомбылық болған отбасында өскен адам ретінде, егер оның не істеп жатқанын күдіктенсем, Эпштейннің ұшағына отырмас едім, керісінше өзім оны әділет органдарына тапсырған болар едім», — деді Клинтон.

Бұған дейін комитет алдында оның жұбайы Хиллари Клинтон да сөз сөйлеген. Ол Эпштейнмен кездескенін есіне түсіре алмайтынын және оның қылмыстары туралы айтар ештеңесі жоқ екенін мәлімдеді. Сонымен қатар, ол куәлік беру үшін Дональд Трамп-ты шақыруға үндеген.

BBC-дің Орыс қызметінің мәліметінше, бұл — 1983 жылдан бері алғаш рет АҚШ-тың бұрынғы президенті Конгресс комитеті алдында куәлік беріп отырған жағдай.

Комиссияның республикалық партиядан төрағасы, конгрессмен Джеймс Комер бірнеше рет Клинтондарға қандай да бір құқықбұзушылық айыбы тағылмағанын, алайда олар Эпштейннің олардың қайырымдылық қорымен ықтимал байланысына қатысты сұрақтарға жауап беруі тиіс екенін мәлімдеген.