Бишімбаевтың экс-әйелі оны ата-ана құқығынан айыруды талап етті

Қазіргі уақытта іс қаралуға қабылданғанымен, сот отырысы әлі тағайындалмаған.

ҚР заңнамасына сәйкес, ата-ана құқығынан айыруға негіз болатын жағдайлардың бірі – отбасындағы кісі өлтіру. Қуандық Бишімбаев Салтанат Нүкенованы аса қатыгездікпен өлтіргені үшін айыпталған. Алайда олардың арасында ресми некенің болмауы бұл істі күрделендіріп отыр.

Бишімбаев өз жауабында балалардың Салтанатты оның жары ретінде қабылдамағанын айтқан. Ал Назым Қахарман керісінше, балалардың Салтанатты өгей анасы ретінде танып, онымен қарым-қатынас орнатқанын алға тартуда.

Сондай-ақ, Қахарман бұрын сотқа балалардың тегін өзгерту туралы да талап қойған. Алайда сот бұл талапты қабылдамай, Бишімбаевтың ата-аналық құқықтарын сақтап қалды. Енді Қахарман қылмыстық жағдайды ескере отырып, оны ата-ана құқығынан толық айыруды сұрап отыр.

Бұл талап арыз қоғамда кең талқыланып, әлеуметтік желі қолданушылары мен құқық қорғаушылар арасында түрлі пікір тудырды. Көпшілік балалардың қауіпсіздігі мен психологиялық жағдайын алдыңғы орынға қою қажет деп есептейді.