«Болашақ» түлегі АҚШ-та оқуға кеткен қаржыны қайтаруға міндеттелді

Түлек оқуын аяқтағаннан кейін Қазақстанға оралу орнына шетелде қалып, қазақстандық компанияда қашықтан жұмыс істеген. Алайда «Болашақ» бағдарламасының ережесіне сәйкес, стипендиаттар оқу бітірген соң 15 күн ішінде елге оралып, кем дегенде бес жыл бойы мамандығы бойынша Қазақстан аумағында жұмыс істеуі тиіс. Қашықтан жұмыс істеу бұл талапқа кірмейді.

Шекара қызметінің мәліметіне сәйкес, стипендиат 2023 жылғы 1 мамырдан бері Қазақстанға кірмеген. Осыған байланысты республикалық комиссия оның стипендиясын тоқтатып, оқуға кеткен қаражатты өндіру туралы шешім қабылдады. Стипендиат бұл шешімге қарсы сотқа жүгінгенімен, сот оның талабын қанағаттандырмады.

«Болашақ» бағдарламасы шетелде білім алған білікті мамандарды елдегі ғылым, экономика және инновация салаларына тарту мақсатында құрылған. Бағдарлама шарты бойынша түлектер елге оралып, өз мамандығы бойынша жұмыс істеуі міндетті. Қашықтан жұмыс істеу ереже талаптарына қайшы саналады.

Соңғы жылдары «Болашақ» түлектері арасында елге оралмағандар саны аз емес. 2023–2024 жылдары шамамен 200-ге жуық түлек мемлекетке оқуға кеткен миллиардтаған теңгені қайтарған. Бұл жағдай бағдарламаның талаптарын қатаң сақтау қажеттігін тағы да еске салады.