Давид Лория Қазақстан футбол федерациясынан кетті

Жиын қорытындысы бойынша, атқару комитетінің 11 мүшесінің 6-сы Лорияның қызметтен кетуін қолдап дауыс берді. Осылайша, аз ғана басымдықпен оның өкілеттігін тоқтату туралы шешім қабылданды.

Давид Лория ҚФФ бас хатшысы қызметіне 2025 жылғы 2 сәуірде кіріскен болатын. Бұл лауазымда ол бір жылға жетпейтін уақыт жұмыс істеді. Ол бұл қызметке отандық футболды реформалау бағдарламасы аясында тағайындалған еді.

Оның орнына кім келеді?

Федерацияның бас хатшысының міндетін уақытша Александр Кеплин атқарады. Ол бұған дейін ҚФФ-да ақпараттық саясат пен халықаралық қатынастар бағытына жауапты болған.

Еске салайық, Давид Лория – Қазақстан футболы тарихындағы ең тәжірибелі қақпашылардың бірі. Ол ұлттық құрама сапында 46 матч өткізген. Оның спорттағы немесе әкімшілік мансабын әрі қарай қалай жалғастыратыны әзірге белгісіз.