Жазылу
Делси Родригес Венесуэланың уақытша президенті болады
Венесуэла Жоғарғы соты елдің вице-президенті Делси Родригес Николас Мадуро жоқ кезде мемлекет басшысының міндетін уақытша атқаруы тиіс деген шешім шығарды.
Сот мәлімдемесінде бұл қадам «басқарудың сабақтастығын қамтамасыз ету және елді жан-жақты қорғау» мақсатында қабылданғаны айтылды.
«Заңды президент – Мадуро»
Бұған дейін, сенбі күні Делси Родригес Венесуэланың мемлекеттік телеарнасы арқылы халыққа үндеу жасап, Николас Мадуро елдің бірден-бір заңды президенті болып қала беретінін мәлімдеген еді. Ол АҚШ-тың Венесуэлаға қарсы «қарулы агрессиясын» қатаң айыптап, қазіргі билік халықты қорғауға дайын екенін жеткізді.
Родригестің видеомәлімдемесі кезінде оның қасында Венесуэла парламентінің төрағасы Хорхе Родригес, ішкі істер министрі Диосдадо Кабельо және қорғаныс министрі Владимир Падрино Лопес болды. Бұл биліктің бірлігі мен қауіпсіздік құрылымдарының қолдауын көрсету ретінде бағаланды.
Трамптың мәлімдемелері және Вашингтонның ұстанымы
Осыдан бұрын АҚШ президенті Дональд Трамп Венесуэланы болашақта кім басқаратыны туралы сұраққа жауап бере отырып, АҚШ мемлекеттік хатшысы Марко Рубио Делси Родригеспен сөйлескенін айтқан. Трамптың сөзінше, Родригес «Америка Венесуэланы қайтадан ұлы ету үшін қажет деп тапқан қадамдарды жасауға дайын» екенін жеткізген.
Сонымен қатар Трамп, қажет болған жағдайда АҚШ әскерін Венесуэлаға енгізу мүмкіндігін жоққа шығармайтынын мәлімдеді. Бұл сөздер аймақтағы ахуалды одан әрі шиеленістіре түсті.
Жоғарғы соттың шешімі Делси Родригесті уақытша президент ретінде бекіткенмен, Каракас Мадуроның заңдылығын сақтап қалуға тырысып отыр.
