ДСМ «зиянды вакциналар» туралы мәлімдемені жоққа шығарды

Бұл туралы Kazinform хабарлады.

Министрлік Күлзада Абенованың «Әңгіме бар» подкастында айтқан пікірлеріне қатысты мәлімдеме жасауға мәжбүр болған. Ведомство мұндай тұжырымдар ғылыми дәлелдерге негізделмегенін айтады.

Вакциналар қалай тексеріледі?

Денсаулық сақтау министрлігінің мәліметінше, Қазақстанда Ұлттық профилактикалық егу күнтізбесі аясында қолданылатын барлық вакциналар көпсатылы халықаралық және ұлттық сараптамадан өтеді. Олар Дүниежүзілік денсаулық сақтау ұйымы талаптарына және ұлттық заңнамаға сай тіркеліп, қолдануға рұқсат алады.

Вакциналарды сатып алу арзан емес, тек:

• сапа, қауіпсіздік және тиімділік көрсеткіштері бойынша;

• ДДСҰ преквалификациясының немесе қатаң реттеуі бар елдерде тіркеудің болуы;

• клиникалық зерттеулер нәтижелері;

• халықаралық GMP стандарттарына сәйкестік;

• тіркеуден кейінгі қауіпсіздік мониторингі деректері ескеріле отырып жүзеге асырылады.

«Вакциналар ауру тудырады» дегенге жауап

Министрлік өкілдері вакциналар балаларда ауру тудырады деген мәлімдемелердің ғылыми негізі жоқ екенін және көпжылдық халықаралық бақылау деректеріне қайшы келетінін айтты.

Керісінше, иммундау қауіпті жұқпалы аурулардан болатын ауру мен өлім-жітімді айтарлықтай азайтқан. Соның нәтижесінде мыңдаған ауыр асқынулар мен өлім жағдайларының алдын алуға мүмкіндік туған.

Нақты көрсеткіштер

Ведомство дерегінше, соңғы 34 жылда Ұлттық иммундау саясатының арқасында:

• эпидемиялық паротит 100 еседен астам азайды (1990 ж. – 12 194 жағдай, 2024 ж. – 118);

• вирусты гепатит А 32 еседен астам төмендеді (1990 ж. – 73 962, 2024 ж. – 2 289);

• вирусты гепатит В 92 есе қысқарды (1990 ж. – 5 287, 2024 ж. – 57).

Балалар арасында:

• қызылшамен сырқаттану 90%-дан астам;

• қызамық пен паротит 95% төмендеген.

Қазақстанда полиомиелит 1996 жылдан бері, дифтерия 2009 жылдан бері тіркелмеген.

Министрлікте Қазақстанда фармаконадзор мен жанама әсерлерді мониторингтеу жүйесі жұмыс істейтіні айтылды. Әрбір күмәнді жағдай мамандар тарапынан мұқият талданып, қауіп анықталса, заңнамаға сай жедел шаралар қабылданады.

Ведомство медициналық білімі жоқ тұлғалардың мұндай мәлімдемелері ата-аналарды адастырып, денсаулық сақтау жүйесіне сенімді әлсірететінін және балалар денсаулығына нақты қауіп төндіретінін ескертті.