Екібастұзда кісі өлтіру мен адам өлтіруге оқталу дерегі бойынша күдікті ұсталды

Telegram-арналарда жәбірленушілердің біріне жасалған шабуыл сәті бейнеленген бейнежазба тарады. Оқиға көпқабатты тұрғын үйдің кіреберісінде болған. Кадрларда қанға боялған әйелдің баспалдақпен төмен түсіп бара жатқаны, ал оның артынан күдіктінің ілесіп, жәбірленушінің денесіне бірнеше рет соққы жасағаны көрінеді.

Павлодар облыстық полиция департаменті оқиғаға қатысты түсініктеме берді. Ведомство мәліметінше, оқиға 9 қаңтар күні Екібастұз қаласында болған.

"Оқиға орнына келген полиция қызметкерлері тұрмыстық жанжал кезінде, болжам бойынша алкогольдік мас күйде болған адамдардың бірі бірнеше рет пышақ жарақатын алып, оқиға орнында көз жұмғанын анықтады. Сонымен қатар тағы бір әйел пышақ жарақатын алып, медициналық мекемеге жеткізілді, - деп хабарлады полиция департаменті.

Қазіргі уақытта күдікті ұсталып, уақытша ұстау изоляторына қамалды. Аталған факті бойынша кісі өлтіру және кісі өлтіруге оқталу баптары бойынша қылмыстық іс қозғалды.