Жазылу
Экс-әкім Бауыржан Байбек пен отбасына қатысты ешқандай қылмыстық іс тіркелмеген
Алматы қаласының бұрынғы әкімі, саяси элита өкілі Бауыржан Байбекке және оның отбасы мүшелеріне қатысты ешқандай қылмыстық іс қозғалмаған.
Бұл туралы бүгін Қаржылық мониторинг агенттігі төрағасының орынбасары Жеңіс Елемесов мәлім етті.
«Бауыржан Байбек пен оның отбасына қатысты тергеу жүргізілмейді. Қазіргі таңда ешбір қылмыстық іс жоқ», - деді ол Мәжіліс кулуарында журналистердің сұрағына жауап бере отырып.
Айта кетейік, Байбек 2015–2019 жылдары Алматы қаласының әкімі болып қызмет атқарған. Одан кейін «Nur Otan» партиясы төрағасының бірінші орынбасары қызметін де атқарды. Алайда 2022 жылғы Қаңтар оқиғасынан кейін барлық лауазымынан айырылып, саяси аренадан кетті. Содан бері ол қоғам назарынан тыс қалған.
Сонымен қатар Елемесов рейдерлікпен және ұйымдасқан қылмыстық топпен байланысы болған деп айыпталған Елдос Қоспаевтың ісі бойынша сот үкімі шыққанын да хабарлады.
«ОПГ Қоспаевқа қатысты үкім шықты. Бірқатар мүлік мемлекетке тәркіленді», - деді ол.
Қоспаев пен оның тобына рейдерлік, бопсалау, заңсыз табыс табу, кәсіпкерлердің бизнесін тартып алу сияқты ауыр айыптар тағылған болатын. Бұл іс соңғы жылдардағы ең резонансты істердің бірі саналады.
Қоғамда біраз уақыттан бері Бауыржан Байбекке қатысты түрлі күдіктер мен қауесеттер айтылып келген еді. Алайда ресми органның мәлімдемесі бұл болжамдарға нүкте қойып отыр.
