Жазылу
Экс-министр Бекетаевқа қатысты іс «құпия» тергеледі
«Қызметтік өкілеттігін асыра пайдаланды» деген күдікке ілінген бұрынғы әділет министрі Марат Бекетаевқа қатысты қылмыстық іс «Құпия» ретінде тергелуде. Бұл туралы Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов айтты, деп жазады Vlast.kz.
«Файлдар «Құпия» ретінде жіктеледі. Миллиондаған доллар шығынға батып, шешімі табылмаған арбитраждық істер республиканың пайдасына болмағандықтан, қазір тиісті тергеу амалдары жүргізілуде. Бұл бір нәрсе ме, әлде екі түрлі қылмыстық іс пе қазір айта алмаймын.Біз бұл істерге міндетті түрде құқықтық баға береміз», - деді Сарқұлов.
Еске салайық, 2023 жылдың қазан айында Сыбайлас жемқорлыққа қарсы қызмет бұрынғы әділет министрі Марат Бекетаевтың заңсыз тәркіленген активтерді іздеу және қайтару аясында ұсталғанын хабарлаған болатын. Ведомствоның мәлімдеуінше, ол мемлекетке аса ірі көлемде зиян келтіріп, аффилиирленген компанияның мүддесін қорғаған.
Бірнеше күннен кейін Бас прокурордың орынбасары Әсет Чиндалиев журналистерге Бекетаевтың Қазақстаннан қашпақ болған жерінде ұсталғанын айтты.
Айта кетейік, Марат Бекетаев 2016-2022 жылдар аралығында Қазақстанның Әділет министрі болған. 2022 жылдың қаңтарында үкімет отставкаға кеткеннен кейін ол жаңа министрлер кабинетіне кірмей, премьер-министрдің кеңесшісі болып тағайындалды.
