Елімізде 12–16 мамыр аралығында Репродуктивті денсаулық апталығы өтеді

 Бұл апталықты ұйымдастырушы – ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия. Бұл туралы ҚР Мәдениет және ақпарат министрі Аида Балаева мәлім етті.

Апталық аясында жасөспірімдер мен жастар арасында репродуктивті денсаулыққа жауапкершілікпен қарау мәдениетін қалыптастыру, жыныстық жолмен берілетін инфекциялардың, АИТВ жағдайларының алдын алу және жыныстық сауаттылықты арттыру мақсаты көзделіп отыр.

«Аңсаған сәби» бағдарламасы – нақты қадамдардың бірі

Президент Тоқаевтың қолдауымен жүзеге асып жатқан «Аңсаған сәби» бағдарламасы – репродуктивті денсаулықты қолдауға бағытталған мемлекеттік саясаттың маңызды бөлігіне айналды. 

Бүкіл ел бойынша ашық есік күндері өтеді

Апталық барысында еліміздің барлық өңірінде орналасқан 103 жастар денсаулық орталығы мен бастапқы медициналық-санитарлық көмек ұйымдарында ашық есік күндері, тақырыптық дәрістер, тренингтер, интерактивті сессиялар және онлайн-вебинарлар өтеді. Бұл іс-шаралар жастардың медициналық, психологиялық, әлеуметтік және құқықтық мәселелер бойынша кеңес алу мүмкіндігін кеңейтеді.

Қоғамдық қолдау мен ақпараттық серіктестік маңызды

Ұйымдастырушылар бұқаралық ақпарат құралдары мен кәсіби қауымдастықтарды, қоғамдық пікір көшбасшыларын апталықты кеңінен жариялап, шынайы әрі ғылыми негізделген ақпарат таратуға шақырады.

«Денсаулық – хабардарлықтан басталады. Репродуктивті денсаулықты қоғамдағы басты құндылыққа айналдыру – баршамыздың ортақ міндетіміз», – делінген министр жазбасында.

Апталық аясындағы іс-шаралар мен нақты кесте туралы толық ақпаратты www.rephealth.kz сайтынан алуға болады.