Елімізде Ресейдің өтініші бойынша соғысқа қарсы белсенді қамауға алынды

Алматыда Ресейдің өтініші бойынша 18 жастағы воронеждік, соғысқа қарсы белсенді Павел Владимиров ұсталды, деп хабарлайды Alliance of the post-Soviet Left жобасы. Ол 4 қыркүйекте қамауға алынған, бірақ ол жақында ғана белгілі болды.

Тұтқындаудан тура бір күн бұрын Росфинмониторинг Владимировты «террористер мен экстремистер» тізіміне қосқан. Оны қамауға алған Алматы сотының шешімінен Владимировқа Ресейде террористік ұйымның қызметіне қатысуға дайындалу ісі бойынша іздеу жарияланған (Ресейдің Қылмыстық кодексінің 20-бабының 1-бөлігі, 205-бабының 2-бөлігі). Оның қудалануына нақты не себеп болғаны белгісіз.

Оның ұсталғаны туралы жобаға якут белсендісі Айхал Аммосов (Игорь Иванов) хабарлады.

Владимиров Аммосов арқылы достарына жіберген хатта оны «ФСБ тұтқынға алғаны» айтылады.

«Менің жағдайым жақсы, тергеу изоляторында 1 жыл отыруым керек, сосын босатады.  Ресейге экстрадицияламайды. Маған көмектесетін жақсы әрі тәжірибелі заңгер бар», – деп жазған хатында ол.

 Воронежде Владимиров көшедегі белсенділікке белсене араласқан. Ол соғысқа қарсы үнпарақтар іліп, граффитилер салып, митингілерге қатысқан. Туыстарының айтуынша, ол өзін анархист санайды.