Елордада кезекті еңбек жәрмеңкесі өтті

Қазіргі таңда жұмысқа мұқтаж азаматтар бұл жәрмеңкені асыға күтетін болған.

Осы орайда атап өтсек, бұл жәрмеңке алдыңғы жәрмеңкеден өзгерек болып отыр. Өйткені бұл шараны елордалық Халықты жұмыспен қамту орталығы жұмыссыз азаматтарға, оның ішінде бас бостандығынан айыру орындарынан босатылған және пробация қызметінің есебінде тұрған адамдарға, сондай-ақ алимент бойынша қарызы бар адамдарға арнап өткізген. Шын мәнінде елімізде жай азаматтардың өзінің жұмыс табуы қиындау, ал тағдыр тәлкегіне түсіп, істі болған азаматтар өзін қоғамның өгей баласындай сезінетіні жасырын емес. Осы орайда аталмыш бос орындар жәрмеңкесінің бас бостандығынан айыру орындарынан босатылған және пробация қызметінің есебінде тұрған адамдарға арнайылап өткізілуі көңіл қуантады. Бұл да болса сотталған азаматтарды қоғамға бейімдеудің бір көрінісі. Әйтпесе жұмысы жоқтық, қоғамнан өзін таба алмаудың салдарынан кейбір сотталған азаматтардың қайтадан темір торға ұмтылуына ықпал етіп, тіпті қылмысқа да ұрындыруы әбден мүмкін. Сондықтан бұл жәрмеңкенің көздеген мақсаты да ерекше деп айта аламыз.

Жәрмеңкеге қатысқан жұмыссыз азаматтарға бос жұмыс орындары жөнінде жұмыспен қамтудың белсенді шаралары бойынша ақпараттар берілді. Елордалық Халықты жұмыспен қамту орталығының бастамасы жәрмеңкеге қатысқан азаматтарға аса пайдалы болғаны байқалады. Өйткені жұмыс іздеушілердің тым белсенділігі байқалды. Демек жәр­­меңке жұмыс беру­шілер мен жұмыс іздеушілер ара­сын­да бай­ланыс орнатып, мамандық дайын­­дау мәселелерін еңбек нары­ғын­­дағы жұмыс күшінің қажетті­лігі­не сәйкес ұйымдастыру мақсатына жетті деп айта аламыз. Жалпы жәрмеңкеге 8 мекеме қа­тысып, 127 бос жұмыс орнын ұсынып, шараға қатысушыларға бағыт-бағдар сілтеген. Жұмыс берушілер жол­­дар мен автокөлік жолдарын салу, құрылыс, ақпарат және байла­ныс, сауда, ет және құс еті өнімдерін өндіру, жиһаз жасау секілді салалар бойынша бос жұмыс орын­дарын ұсынған.

 Жұмыс ұсынушылардың бірі Ерік Әпсеметов: «Мұндай ма­мандықтар жәрмеңкесінің ұйым­дас­тырылуы жұмыс беруші мен жұ­мыс іздеуші үшін өте маңызды. Бүгінгі шарада біз ұсынған мамандықтарға қызығушылар көп болды. Сондықтан біз де іздегенімізді таптық деп ойлаймыз. Мәселен, біздің компания үй мен кеңсеге ар­нал­ған жиһаз жасау, материал­дар­ды сату, перде тігу, қабырға панельдерін жа­сау, тас төсеу және жүк тасымалы қыз­меттерін ұсынады. Қарапайым мамандықтар болса да, ұсынып отырған жалақысы талапқа сай. Бүгін біз 20 бос жұмыс орнын ұсынып отырмыз. Ағаш ұстасы, ұста, шкаф жиһазын құрас­тырушы, тегістеуші, сырлаушы, сату бойынша менеджер, әртүрлі жал­дамалы жұмысшылар керек» деді. Жәрмеңкені ұйымдастырушылар алдағы уақытта мұндай жәрмеңкелер әлі де жалғасын табатынын айтты.