Елзат Ескендірдің "Әбіл" фильмі халықаралық фестивальде екі жүлдеге ие болды

Бұл туралы режиссердің өзі facebook парақшасында мәлімдеді.

"Биыл 24-і рет өткізіліп отырған Дакка халықаралық фестивалі – Бангладештің бас фестивальі. Фестивальдің биылғы конкурстық бағдарламасына норвегиялық кинопродюсер Ингрид Лилл Хёгтун, италиялық кинопродюсер, дистрибьютор Лидия Генчи, бангладештік белгілі актриса Сайеда Тухин Ара Карим, жапониялық режиссер Масахиро Ото, түркиялық режиссер Рейис Челик қазылық етті. Фестивальге Қытай, Иран, Индия, Қырғызстан т.б. елдердің фильмдері қатысқан. "Әбіл"-дің кезекті жүлдесіне әрі әлемдік көрермендер кеңістігінің кеңейуіне біз бек қуаныштымыз", - деп жазды Елзат Ескендір.

Фильм не жайлы?

"Әбіл" фильмі Совет Одағы құлап, колхоз-совхоз тарап, мал-мүлік бөліске түсіп, елде приватизация орын алған кезеңдегі қиянатқа ұшыраған қарапайым адамдар мен қараусыз қалған қазақ ауылындағы бейберекетсіздікті суреттейді. Сол арқылы кинотуынды тәуелсіздік басындағы күрделі уақыт ағымындағы қазақ халқының рухани кейпіне, психологиялық күйіне әлеуметтік талдау жасауды ұсынады. Фильмде советтік жүйе кезіндегі адам өмірінің құнсыздығы, қазақ халқының тұрмыс-тіршілігінің ерекшелігі мен өз жерінде, өз елінде кемсітушілікке ұшырағандығы, социализнен капитализмге ауысу кезеңіндегі екіұдай сезім, сонымен қатар, жемқорлықтың пайда болуы жайлы да ой қозғайды. Фильм үлкен тарихи оқиғалар кезіндегі кішкентай адамдардың тағдырын суреттеуді негіз еткен.

“Әбіл” биыл 14-қаңтардан бастап Франция бойынша прокатқа шықты. Парижден Леонға дейін көрсетіліп жатыр. Кинотеатрлар күніне бірнеше сеанстан қойған. Француз БАҚ өкілдері фильмді жоғары бағалаған бірнеше рецензия жазды.

Айта кетейік, Елзат Ескендірдің "Әбіл" фильмі былтыр 11-18 ақпан аралығында Везульде (Франция) өткен 31-ші Халықаралық Азия кинофестивалінде жеңімпаз атанды. Фильм бірден үш жүлдені жеңіп алды.

Марапаттарды атап айтқанда:

* Jury Grand Prize (Қазылар алқасының бас жүлдесі)

* Critical Jury Prize (Киносыншылар алқасының жүлдесі)

* NETPAC Jury Prize (NETPAC қазылар алқасының жүлдесі)

Көрермендер мен қазылар алқасы Елзат Ескендірдің дебюттік фильмін жоғары бағалаған. Кинотуынды Алматы облысы, Ұйғыр ауданында түсірілген. Фильм подюсерлері Серік Әбішев, Сергей Әзімов, Ерлан Бекқожин. Ко-продюсер Юлия Ким. 

Басты рөльдерде белгілі дәстүрлі әнші, өнертанушы, публицист Ерлан Төлеутай, М.Әуезов театрының белгілі актерлері Нұржан Бексұлтанова, Әлихан Лепесбай, Ғ.Мүсірепов театрының актері Ұлан Нүсіпәлі ойнаған.

Фильм Қазақстан Республикасының Мәдениет және Ақпарат Министрлігінің тапсырысымен, Ұлттық киноны қолдау мемлекеттік орталығының қолдауымен Қазақфильм киностудиясында түсірілді. Кинокартинаның дистрибьюторы "Tanaris" студиясы.