Еске алу турнирі өтті

Еске алу турниріне жол полициясы, қылмысты іздестіру, күзет басқармасы және ішкі істер департаменті мен қалалық ІІБ ардагерлері қатысты. Салтанатты жиын марқұм Темірбек білім алған Ақтөбе қаласындағы №33 қазақ орта мектебіндегі спорт залында өтті. Еске алу турнирін Ақтөбе облыстық полиция департаментінің бастығы полиция полковнигі Абай Жүсіпов ашып, жиналғандарды құттықтады. Марқұмның ата-анасына ДП, ҚАКБ, Жол ПБ атынан сыйлықтар табыс етілді. Сонымен қатар Ақтөбе облыстық ПД құрылымдарының ардагерлер кеңесінің төрағалары сөз алып, ұрпақтар сабақтастығының жалғасуына ақжолтай тілектерін жолдады. Волейбол турнирінде жүлделі 1 орынды жол полициясының ардагерлері жеңіп алды. 2 орынды №33 орта мектеп командасы алса, 3 орынды облыстық ПД иеленді. Темірбек Жақсылықбаев «Айбын» орденімен қаза тапқан соң марапатталған еді. Қызмет бабында ерлікпен қаза тапқан батыр есімі әріптестері мен жақындарының есінде мәңгі ұмытылмайды.