Еуроодақ 2027 жылдың соңына дейін Ресей газына толық тыйым салуды жоспарлап отыр – Bloomberg

 Бұл туралы Bloomberg агенттігі хабарлады. Жоспарға газдың екі түрі – құбыр арқылы тасымалданатын және сұйытылған табиғи газ да кіреді.

Bloomberg дереккөздерінің айтуынша, Еурокомиссия маусым айында Ресеймен жаңа келісімдер жасасуға және қолданыстағы спот келісімшарттар аясында газ сатып алуға тыйым салуды ұсынады. Бұл қадам қазіргі Ресейден келетін газ көлемінің үштен бір бөлігіне әсер етуі мүмкін.

Агенттік мәліметінше, ресми жарияланым 6 мамыр күні Страсбургте белгілі болады. Шектеулер осы жылдың соңына дейін күшіне енуі ықтимал. Алайда толық тыйым салу мерзімі Еуроодақ елдерінің АҚШ, Катар, Канада және Африка елдерінен келетін сұйытылған газ бойынша балама жеткізушілер табуына байланысты.

Қазіргі таңда Ресейден Еуропаға газ жеткізу көлемі 2022 жылы Украинаға басып кіруден кейін күрт қысқарған. Соған қарамастан, Ресей Түркия арқылы өтетін газ құбыры мен сұйытылған газ жеткізу арқылы Еуропа үшін маңызды жеткізуші болып тұр.

2024 жылы Ресейден сұйытылған газ жеткізу рекордтық деңгейге жетіп, ЕО-ның жалпы импортының 19 пайызын құрады. Бұл көрсеткіш 2022 жылдың басында, соғыс басталмай тұрып, 40 пайызға жуық болған.

Бұған дейін Reuters агенттігі Еуроодақтың Ресейден сұйытылған газ импортын шектеу жоспарын кейінге қалдырғаны туралы хабарлаған болатын. Енді бұл жоспар қайта жандануы мүмкін.

Егер бұл бастама жүзеге асса, Еуроодақтың энергетикалық стратегиясында жаңа кезең басталып, Ресейге энергетикалық тәуелділік болмауы мүмкін.