Еуропа елдері: Навальный эквадорлық бақаның уымен уланған

Ресейлік оппозиционер Алексей Навальныйдың өлімі шамамен эпибатидинмен улану салдарынан болған. Мұндай қорытындыға Ұлыбритания, Германия, Нидерланд, Франция және Швеция үкіметтері келген. Аталған елдердің зертханалары саясаткердің биоматериал үлгілерінен удың іздерін анықтаған.

Бес елдің СІМ-дерінің бірлескен мәлімдемесін 14 ақпан, сенбі күні Ұлыбританияның сыртқы істер ведомствосы жариялады. Бұған дейін еуропалық зертханалардың зерттеу деректері туралы The Insider және Der Spiegel басылымдары хабарлаған болатын. Сонымен қатар, оппозиционердің жұбайы Юлия Навальнаяның осы тақырыптағы бейнеүндеуі «Команда Навального» Telegram-арнасында жарияланған.

Мәлімдемеде улы бақалардың Оңтүстік Америкада мекендейтіні, Ресей аумағында кездеспейтіні және тұтқында эпибатидин өндірмейтіні атап көрсетілген.

«Ресей Навальный табиғи себептерден қайтыс болды деп мәлімдеген еді. Алайда эпибатидиннің жоғары уыттылығын және хабарланған симптомдарды ескере отырып, оның өліміне улану себеп болғаны ықтимал», — делінген бірлескен мәлімдемеде.

Бес елдің өкілдері бұл мәселе бойынша Мюнхен қауіпсіздік конференциясында да бірлесіп сөз сөйлеуді жоспарлап отыр.

Ұлыбританияның ұстанымы

Ұлыбритания СІМ-і «Навальный Сібірдегі ресейлік түзеу колониясында жазасын өтеп жүрген кезде оған бұл улы затты қолдануға тек Ресей мемлекетінің ғана мүмкіндігі, ниеті және ресурстары болды» деп мәлімдеді.

«Біз Ресей мемлекетін оның өлімі үшін жауапты деп санаймыз», — делінген Лондонның жеке мәлімдемесінде.

Деректер Химиялық қаруға тыйым салу ұйымына жолданды

Бес елдің сыртқы істер министрлері 14 ақпанда Ресей тарапынан Химиялық қаруға тыйым салу туралы конвенцияның бұзылуына қатысты ақпаратты Химиялық қаруға тыйым салу ұйымының бас директорына тапсырғандарын мәлімдеді.

«Біз Ресейдің барлық химиялық қаруын жоймағанына алаңдаулымыз. Біз және серіктестеріміз Ресейдің жауапкершілігін қамтамасыз ету үшін барлық саяси тетіктерді қолданатын боламыз», — делінген мәлімдемеде.

Навальныйдың улануы және қазасы

Алексей Навальный 2020 жылдың тамызында Томск–Мәскеу рейсі кезінде есінен танып, ұшақ Омбыға шұғыл қондырылған еді. Кейін ол есін жимастан Берлиндегі «Шарите» клиникасына жеткізіліп, емдеу және оңалту шаралары жалғасты.

Германия Қарулы күштерінің арнайы зертханасы жүргізген токсикологиялық талдау нәтижесінде Навальныйдың ағзасынан «Новичок» тобына жататын жүйке-паралитикалық заттың іздері табылған. Осындай қорытындыға Швеция мен Франция зертханалары, сондай-ақ ОЗХО сарапшылары да тәуелсіз түрде келген.

2021 жылдың қаңтарында Навальный Ресейге оралып, сол жерде ұсталып, сотталған. Үш жылдан кейін, 2024 жылғы 16 ақпанда Ямало-Ненец автономиялық округіндегі колонияда белгісіз жағдайда көз жұмды.

The Insider және Der Spiegel басылымдарының жазуынша, Навальныйдың биоматериал үлгілерін оның отбасы Ресейден алып шыға алған.