«Филологтар тым көп»: Қасым-Жомарт Тоқаев ұлт менталитетін өзгертуге шақырды

Оның пікірінше, елде гуманитарлық мамандарды жаппай даярлау үрдісінен техникалық кадрларға бетбұрыс жасау керек.

Әл-Фараби атындағы Қазақ ұлттық университеті-де өткен ғылыми қауымдастықпен кездесуде Мемлекет басшысы биылғы жыл Қазақстанда Цифрландыру және жасанды интеллект жылы болып жарияланғанын еске салды. Президент ел ғылым, техника және күрделі өндірістік процестер бағытына қарай дамуы тиіс екенін атап өтті.

Гуманитар мамандардың артықтығы туралы

Мемлекет басшысы қазақстандық жастардың мамандық таңдауындағы теңгерімсіздікке сыни көзқарас білдірді.

— Бізде заңгерлер, филологтар, дипломаттар, яғни гуманитарлық мамандар тым көп. Ұлттың менталитетін өзгертуіміз керек. Ал менталитетті өзгерту дегеніміз – оны ғылым мен технологияға бұру. Бұған біздің шамамыз жетпейді деп кім айтты? Меніңше, біз Қазақстанда нағыз менталдық революция жасауымыз керек, - деді Қасым-Жомарт Тоқаев.

Университеттердің рөлі және жаңа элита

Президент жоғары оқу орындары тек «әлеуметтік қызмет көрсетуші» ретінде қабылданбауы тиіс екенін айтты. Қазіргі жағдайда білім беру – интеллектуалдық элитаны қалыптастыратын маңызды өндірістік күшке айналды.

Жасанды интеллект университеті және ғылым болашағы

Цифрлық трансформацияның маңызды кезеңдерінің бірі – арнайы жоғары оқу орнының ашылуы.

• Жасанды интеллект университеті – биыл алғашқы студенттер мен магистранттарды қабылдайды;

• Ғылыми база – Президент ЖИ-ді дамыту дамыған университеттік ортасыз мүмкін еместігін атап өтті;

• Жастарды қолдау – мемлекет жаһандық академиялық байланыстар мен заманауи инфрақұрылымға қолжетімділікті қамтамасыз етеді.

— Күрделі алгоритмдер мен инженерлік өнімдер ең алдымен дамыған ғылыми және университеттік ортада пайда болады. Сондықтан бұл бағытқа ерекше көңіл бөлініп отыр, - деді  Мемлекет басшысы.