Флоридада АҚШ пен Украина арасында келіссөздер өтті

30 қарашада ұйымдастырылған бұл кездесу Украинадағы соғысты тоқтатуға бағытталған АҚШ-тың жаңа бейбіт бастамасын талқылауға арналды. Келіссөздерге АҚШ тарапынан мемлекеттік хатшы Марко Рубио, арнайы өкіл әрі бизнесмен Стив Уиткофф және президент кеңесшісі Джаред Кушнер қатысты. Украинаны Ұлттық қауіпсіздік және қорғаныс кеңесінің жетекшісі Рустем Умеров таныстырды.

Кездесу барысында соғысты тоқтату жолдары, қауіпсіздік кепілдіктері, Украинаның болашақ егемендігі мен аумақтық тұтастығына қатысты ұзақ мерзімді шешімдер қарастырылды. АҚШ бастаған бейбіт жоспардың негізгі мақсаты – қақтығысты кезең-кезеңімен реттеп, тұрақты әрі ұзақ мерзімді келісімге қол жеткізу. Әңгіме тек соғыс қимылдарын тоқтатумен шектелмей, соғыстан кейінгі Украинаның саяси, экономикалық және қауіпсіздік жағынан орнығуына бағытталды.

Келіссөздер аяқталғаннан кейін Марко Рубио пікірталасты «өте өнімді» деп бағалап, бірақ «әлі де үлкен жұмыс күтіп тұрғанын» атап өтті. Украиналық тарап та оптимистік көзқарас танытып, Рустем Умеров екі елдің бейбітшілік, қауіпсіздік және егемендік мәселесінде ортақ ұстанымдарға жақындағанын айтты. Алайда нақты шешімдер әзірге жария етілген жоқ. Бұл — талқыланып жатқан мәселелердің өте сезімтал әрі күрделі екенін көрсетеді. Әсіресе аумақтық сұрақтар мен қауіпсіздік кепілдіктері бойынша келісімге келу оңай болмай тұрғаны байқалады.

Халықаралық ақпарат көздерінің хабарлауынша, Флоридадағы кездесу кей сәтте шиеленісті өткен. Күрделі мәселелер бойынша ортақ пікір табу да оңайға түспеген. Соған қарамастан екі тарап «егемендікке нұқсан келмейтін әрі әділ шешімге ұмтылу» қағидасын қолдайтынын көрсетті. Дегенмен көптеген тетік әлі пысықталып, құпия форматта талқылуда.

Келіссөздердің келесі кезеңі де айқындалды: АҚШ-тың арнайы өкілі Стив Уиткофф жақын күндері Мәскеуге сапар шегеді. Онда ол Флоридада талқыланған ұсыныстардың ресми нұсқасын Ресей тарапына таныстыруы мүмкін. Бұл — бейбіт процестің жалғасуына, сондай-ақ Вашингтонның соғысты тоқтату бағытында белсенді және жан-жақты делдалдық рөл атқарып жатқанын аңғартады.

Флоридадағы кездесудің нәтижелері әзірге толық ашылмағанымен, сарапшылар тараптардың позициясын жақындатуға бағытталған нақты прогресс бар екенін айтуда. Ал бейбіт келісімнің түпкілікті жетістігі көп жағдайда Ресейдің келіссөзге қаншалық дайын екеніне байланысты болмақ. Қалай болғанда да, бұл кездесу соғысты аяқтауға бағытталған халықаралық күш-жігердің маңызды кезеңдерінің бірі ретінде бағаланып отыр.