Фон дер Ляйен: Украина 2030 жылға қарай Еуропалық Одаққа кіруі мүмкін

Егер Украина реформаларын қазіргі қарқынмен және дәл осындай тиянақтылықпен жалғастырса, 2030 жылға қарай Еуропалық Одаққа кіруі мүмкін. Бұл туралы Еурокомиссия төрағасы Урсула фон дер Ляйен Киевке Ресейдің ауқымды шабуылының үш жылдығына арналған сапары барысында Украина президенті Владимир Зеленскиймен және басқа да шетелдік көшбасшылармен бірлескен баспасөз мәслихатында айтты. Ол Украинаның осындай қиын соғыс жағдайында жүргізіп жатқан реформаларының жылдамдығына, сапасы мен тиімділігіне таң қалған.

Фон дер Ляйен Украинадағы соғыс Еуропаның болашағы үшін ең маңызды және күрделі дағдарысқа айналып отырғанын атап өтті. Ол Украинадағы соғысты бастаған Ресейге қарсы санкцияларды әзірге алып тастау мүмкін емес, өйткені олар Ресей экономикасына «елеулі әсер етеді» деген сенімін білдірді. Оның үстіне, Ресей Федерациясының бейбітшілікті жақтайтынын көрсететін нақты қадамдары жоқ.

Кошта: Келіссөздерді қашан өткізу керегін тек Украина шеше алады

 Еуропалық кеңес төрағасы Антонио Кошта Украинаның Еуропалық Одаққа  қосылуын оның болашақ қауіпсіздігінің ең маңызды кепілі деп атады. Ол сондай-ақ АҚШ президенті Дональд Трамптың Ресейдің Украинадағы соғысын тоқтату үшін келіссөздерді бастау талпыныстарын құптай отырып, «тиімді және ұзақ мерзімді бейбіт келіссөздерді бастау үшін шарттар қашан дұрыс болатынын шешу тек Украинаның құқығы» екенін атап өтті. Ол бұл соғыс «Украинаның ғана емес, Еуропаның қауіпсіздігіне де қатысты» екенін еске салды.

Испания премьер-министрі Педро Санчес Украина мен Еуропаны бейбіт келіссөздерге тарту, сондай-ақ Киевке қауіпсіздік кепілдігін беру қажеттігін баса айтты.

«Біз бейбітшілік туралы айту мүмкіндігі үшін өте ризамыз». Бірақ екіжақты келіссөздер жүргізу үшін біз үшін ынтымақтастық өте маңызды», - деді ол.

Канаданың премьер-министрі Джастин Трюдо өз елінің Украина соғыста жеңіске жеткенше оны қолдауға уәде берді.