Франция Башар Асадты тұтқындауға ордер берді

 Француз судьялары Башар Асадты қамауға алуға ордер берді.

Франция прокурорлары Сирияның биліктен қуылған көшбасшысы Башар Асадты тұтқындауға ордер берді. Ол әскери қылмыстарға, атап айтқанда, бейбіт тұрғындарға қасақана шабуыл жасауға қатысы бар деген күдікке ілінді, деп хабарлайды Reuters.

Мандат 2017 жылы 7 маусымда Сирияда бомбалау кезінде қаза тапқан Салах Әбу Набурға қатысты тергеу аясында берілді. Француз сот органдары Асад шабуылға бұйрық беріп, оған қажетті құралдарды қамтамасыз етті деп санайды.

Бұл француз судьяларының Сирияның бұрынғы президентін қамауға алу туралы екінші ордері екені атап өтілді. 2023 жылдың қарашасында француз судьялары Асадты адамзатқа қарсы қылмыстар мен әскери қылмыстар жасады деп айыптап, қамауға алуға ордер берді. Бұл 2013 жылы тамызда Дума мен Шығыс Гутада мыңнан астам адамның өмірін қиған химиялық шабуылдардан кейін болды.

Асадтың өзі 2011 жылы басталған азаматтық соғыс кезінде қарсыластарына қарсы химиялық қару қолданғанын жоққа шығарды.

Айта кетейік, 8 желтоқсанда Сирияда билік басына «Хайят Тахрир аш-Шам» тобы келді. 10 желтоқсанда Мұхамед әл-Башир өтпелі үкімет басшысы болып тағайындалғанын хабарлады. Башар Асад елден Ресейге қашып кетті. Ресей президентінің баспасөз хатшысы Дмитрий Песковтың айтуынша, Асад отбасына баспана беру туралы шешімді Путин өзі қабылдаған.