Франция премьер-министрі үкіметтің алғашқы отырысы қарсаңында отставкаға кетті

Францияда саяси дағдарыс қайта күшейді. Премьер-министр Себастьен Лекорню өз қызметінен үкіметтің алғашқы отырысы өтпей тұрып-ақ отставкаға кетті. Оның отставкасын президент Эммануэль Макрон қабылдады, деп хабарлады Le Figaro және BFM TV.

Осылайша Лекорнюдың премьерлік мерзімі Францияның қазіргі тарихындағы ең қысқа қызмет ету кезеңі болып тіркелді — ол небәрі бір айға да жеткен жоқ.

Үкіметтің алғашқы отырысы өтпей қалды

Бұрынғы қорғаныс министрі Себастьен Лекорню тамыз айының соңында премьер-министр болып тағайындалған еді. 6 қазанда  оның жаңа кабинеті алғашқы отырысын өткізуі тиіс болатын. Алайда жексенбі кешінде Лекорню кенеттен отставкаға кететіні туралы мәлімдеді.

Оның алдында премьер-министр жаңа министрлер құрамын таныстырған еді — онда Макронның жақтастары мен алдыңғы үкіметтің мүшелері басым болды. Бұл шешім оппозиция тарапынан қатты сынға ұшырады.

 Бір жылда үшінші премьердің кетуі

Лекорнюдың отставкасы — бір жылдың ішінде Франциядағы үшінші, ал 2022 жылдан бері алтыншы премьердің кетуі.

Бұған дейін Франсуа Байру премьер қызметін небәрі тоғыз ай атқарып, парламент үкіметке сенімсіздік вотумын білдіргеннен кейін қызметінен кеткен болатын. Байру жалақы мен әлеуметтік шығындарды қысқартуға бағытталған бюджетті қабылдата алмаған.

Саяси сарапшылардың пікірінше, дәл сол жағдай Лекорню үкіметінде де қайталанды – ол да парламенттегі негізгі партиялардан, әсіресе Социалистік партия депутаттарынан қолдау таба алмады.

 Франциядағы саяси дағдарыс

Оппозициялық саясаткерлер Le Figaro-ға берген пікірлерінде парламентті таратып, жаңа сайлау өткізуді талап еткен. Кейбіреулер тіпті президент Макронның өз еркімен отставкаға кетуін немесе оған импичмент жариялауды ұсынған.

Сонымен қатар, үкімет құрамына кіретін «Республикашылдар» партиясы бүгін кешке кабинеттен шығу мүмкіндігін талқыламақ. Бұл шешім партияның стратегиялық комитетінде қаралады.

Франциядағы қазіргі саяси тұрақсыздықтың бастауы өткен жылы Макронның бастамасымен өткен мерзімінен бұрынғы парламент сайлауынан басталды.
Президент сол кезде өз реформаларын жүзеге асыру үшін саяси базасын кеңейтуді көздеген еді.
Алайда нәтиже керісінше болды:

• бірде-бір партия парламентте көпшілік орынды ала алмады;
• радикалды оңшылдар («Ұлттық бірлестік») мен солшылдар («Жаңа халықтық майдан») көп мандатқа ие болып, Макронмен ынтымақтасудан бас тартты.

Француз сарапшыларының айтуынша, Лекорнюдың отставкасы — жүйенің ішкі дағдарысының көрінісі.

«Францияда саяси механизм тоқтағандай әсер қалдырады. Партиялық бөліну пен қоғамдағы поляризация үкіметті әлсіретті», — дейді париждік саясаттанушы Марк Бертран.

Францияда жаңа премьер-министрдің кім болатыны әзірге белгісіз. Президент Макрон алдағы күндері кеңес өткізіп, жаңа үкімет басшысын тағайындауы тиіс.

Саяси бақылаушылар елде жаңа сайлау өткізу ықтималдығы артып келе жатқанын атаған.