Ғалымға ұстаз, ғылымға ұстын

 Ол шәкірттерінің табысына қуанып, әр жетістігіне мақтанады, ал қателігін көрсе, оны түзеткенше тынбайды. Мейірімді жүзі, сабырлы да байсалды үні қай шәкіртін де ізгі ғылымға жетелейді. Оның алдын көрген мыңдаған шәкірт ұстаз ретінде риясыз махаббатқа бөленген тұлға кім десе, Элеонора Дүйсенқызы деп ойланбай жауап береді.

Ұстаздың еңбегі шәкірттерінің жетістіктері арқылы да бағаланады. Элеонора Дүйсенқызының қолынан ұшқан шәкірттері бүгінде Қазақстанда ғана емес, шетелдік ғылыми орталарда да танымал. Олар өздерінің білімдерін тек теориялық деңгейде емес, практикалық тұрғыда да қолдана отырып, қазақ тілінің дамуы мен халықаралық ғылыми байланыстарды нығайтуға үлес қосуда. Ұстаздың мықты мектебі мен шәкірттерінің жетістіктері оның есімін лингвистика тарихында мәңгілік қалдырары сөзсіз.

Текстология саласы Қазақстанда кенже дамыған сала. Кенжелеп қалған салаға батылы барып, көп ешкім қол соза бермейді. Элеонора Дүйсенқызы, міне, осы жағынан көптеген жас талапты шегі де, шеті де жоқ ғылымға баулыды, кеудесіне сенім ұялатып, жолға салды. Алдына келген шәкірттерімен тең дәрежеде сөйлесіп, жас демей, баласынбай, әрдайым жаңа идеяларды қолдап, ғылыми-зерттеулерге жетеледі.

Элеонора Дүйсенқызы Сүлейменова – Қазақстанның тіл білімі саласындағы аса көрнекті ғалымдарының бірі, филология ғылымдарының докторы, профессор. Қазақ ғылымында шоқтығы биік жан тіл біліміне арналған іргелі еңбектерімен танылған, ғылыми-зерттеу жұмыстарында тіл теориясы, әлеуметтік лингвистика, когнитивтік лингвистика және қазақ тілін оқыту әдістемесі мәселелеріне ерекше көңіл бөлді.

Ол қазақ, орыс, жапон, қытай және ағылшын тілдерінде жарияланған 350-ден астам ғылыми еңбектің авторы. Оның зерттеулері әлемдік және отандық ғылыми қауымдастықта жоғары бағаланады. Ғалымның еңбектері тіл білімі, коммуникация, дискурс және аударма салаларын қамтиды. Үнемі ізденістің үстінде жүретін ғалым тек мақалалармен шектелмей, іргелі зерттеулерге негізделген 8 монография мен 13 ұжымдық монографияны қамтиды. Олардың ішінде беделді Scopus базасына енгізілген The Handbook of Business Discourse атты ұжымдық монографиясы ерекше орын алады.

Ғылым жолында, ұстаздық жолында жан аямай еңбек етіп жүрген ғалымның еңбектері мемлекет тарапынан әр кез бағасын алып келеді. Соның бірі – қара шаңырақ әл-Фараби атындағы Қазақ Ұлттық университетінің 90 жылдығына арналған салтанатты жиында Элеонора Сүлейменова II дәрежелі «Барыс» орденімен марапатталды.

Жанна Күзембекова,

Әл-Фараби атындағы ҚазҰУ-дың доценті, PhD