Гана Украинадағы соғыста 55 азаматы қаза тапқанын мәлімдеді

 Бұл туралы Гананың сыртқы істер министрі Самуэл Окудзето Аблаква мәлімдеді.

27 ақпанда Батыс Африкадағы осы елдің сыртқы істер министрі Самуэл Окудзето Аблаква кемінде 55 ганалықтың Украинадағы соғыс қимылдары барысында қаза тапқанын хабарлады. Ол Ресей тарапынан африкалықтарды заңсыз жалдау схемаларына қарсы күрес жүргізуге уәде берді.

Осы аптада Аблаква Киевке барып, украин әскері тұтқындаған екі ганалық азаматтың тағдырын талқылаған. Сапар барысында Украина билігі барлау деректеріне сүйене отырып, Ресей жағында соғысқа тартылған африкалықтар туралы статистиканы ұсынған.

Министрдің айтуынша, адам саудасымен айналысатын қылмыстық желілер 36 елден 1780 африкалықты алдап, Украинаға қарсы соғысқа қатысуға тартқан. Бұл туралы ол Facebook парақшасында жазды.

Гана азаматтарына қатысты деректер

Аблакваның мәліметінше, 2022 жылдан бері шамамен 272 ганалық майданға кеткен. Қолда бар бағалаулар бойынша, 55 адам қаза тапқан, 2 адам әскери тұтқын ретінде ұсталып отыр.

 «Жауапты үкімет ретінде біз бұл ауыр статистикаға көз жұма алмаймыз. Бұл жай ғана сандар емес — бұл адамдардың өмірі, көптеген ганалық отбасылар мен мемлекетіміздің үміті. Сондықтан үкімет жастарымызды қорғау үшін түсіндіру және алдын алу жұмыстарын күшейтуге бел буды», — деді министр.

Ол сондай-ақ Гана президенті Джон Драмани Махама әкімшілігі заңсыз жалдау схемаларын анықтау және жою бағытында жұмыс істеуге дайын екенін атап өтті.

«Бұл — біздің соғыс емес. Біз жастарымыздың өзге біреулер үшін тірі қалқанға айналуына жол бере алмаймыз», — деді Аблаква.

25 ақпанда Киевте Украина сыртқы істер министрі Андрей Сибихамен өткен бірлескен баспасөз мәслихатында ол Гана азаматтарын жалдау «даркнет» арқылы жүзеге асырылып жатқанын айтты. Осыған байланысты үкімет соғысқа тартылған азаматтардың нақты санын толық растау қиын екенін мәлімдеді.