Германия Ресейдің гибридті соғысына қарсы іс-қимыл жоспарын әзірлеп жатыр

 Бұл туралы канцлер Фридрих Мерц Бундестагтағы мәлімдемесінде хабарлады.

«Біз Ресейдің қорқытуына жол бермейміз», - деді Мерц, Германияның ұлттық қауіпсіздігін қорғауға бағытталған жаңа стратегия туралы айта келе.

Гибридті шабуылдар мен дестабилизация әрекеттері

Канцлер Ресейдің кейінгі апталарда Еуропада гибридті соғыс әдістерін күшейткенін айтты.

«Дәл Ресей Германия мен Еуропаны дестабилизациялау үшін кибершабуыл, дезинформация, диверсия және тыңшылықты белсенді қолданып отыр», - деді ол.

Мерц мысал ретінде дрондардың еуропалық әуе кеңістігін жиі бұзуы мен тыңшылық әрекеттердің көбеюін атады.

«Путин еркін қоғам қорқып, шешім қабылдай алмай қалады деп ойлайды. Бірақ ол қателеседі. Біз қорықпаймыз», - деді Германия үкіметінің басшысы.

Украинаны қолдау мен жаңа санкциялар

Канцлер Мерц Германияның Украинаға қолдауын жалғастыратынын мәлімдеді:

«Біз Украина халқының қорғанысын қанша уақыт қажет болса, сонша уақыт қолдаймыз», - деді ол.

Еуропалық кеңестің алдағы отырысында Ресейге қысымды арттыру және бейбіт келіссөздерге итермелеу жолдары талқыланбақ.

Мерцтің айтуынша, бұл бастама 19-пакеттік жаңа санкциялармен қатар жүзеге асады.

«Мақсат — соғысты ұзарту емес, оны мүмкіндігінше тезірек тоқтату», — деді ол.

"Мұздатылған" ресейлік активтер Украинаға жұмсалмақ

Фридрих Мерц сондай-ақ Ресей Орталық банкінің "мұздатылған" активтерін пайдаланып, Украинаға 140 миллиард еуро көлемінде пайызсыз несие беру идеясын қолдады.
Бұл қаржы тек елдің қорғаныс қажеттіліктерін қаржыландыруға бағытталмақ.

«Украина бұл несиені тек Ресей репарация төлеген соң ғана қайтарады», - деп нақтылады Мерц.

Германияның жаңа ұлттық қауіпсіздік жоспары Ресейдің ақпараттық және кибершабуылдарына қарсы тұруды, инфрақұрылымдық қауіпсіздікті нығайтуды және Еуропадағы тұрақтылықты сақтауды көздейді.