Ғ.Мүсірепов театрында кезекті премьера

Мөлдір өнердің мерейін асқақтатып, көркем өнерге қалтқысыз қызмет етіп келе жатқан өнер ордасы жаңа 79-шы маусымда қала тұрғындары мен көрермені асыға күтуде. Өткен маусымда Қазақстандағы ең көп көрермен келген театр мәртебесіне ие болған өнер ұжымы жаңа маусымға тың жоспарлар құрып, үлкен дайындық үстінде. Ұлы тұлғаның есімін иеленген театр репертуарында жазушының «Ақан сері – Ақтоқты», «Қозы Көрпеш – Баян Сұлу» пьесаларын сахналаса, қазіргі таңда Мәскеу қаласындағы Вахтангов театрының режиссері Гүлназ Балпеисованың режиссерлігімен қойылған «Ұлпан» қойылымы қосылмақ.

1997 жылы режиссер Б.Омаров сахналаған «Ұлпан» қойылымы көрермен көңілінен шығып, лайықты бағасын алған. Тарихи туындының сахналық нұсқа авторы - Қ.Ысқақ болды. Араға 27 жыл салып, сахналық нұсқасын жасап ғана қоймай, үздік заманауи тың шешімдермен қойылымға өзгеше өң берген Г.Балпеисова шығарманы ерекше қырынан ашты. Сонымен қатар, қойылымда қазақ халқының тыныс тіршілігін сипаттайтын жер дауы, жесір дауы, барымташылық, қыз айттыру, қалың мал беру, жарлы мен жақсының күресі тәрізді құбылыстар көрініс табады. Қырдағы өмірдің жаңаруға деген ұмтылысы суреттелген, қазақ халқының жүріп өткен жолы бейнеленген, жомарт жүрегі мен өткір ақыл-ойы бар әйелдің тарихы баяндалған жаңа маусымның ең алғашқы қойылымы көрерменін күтеді. Сондай-ақ, жаңа маусымда театрды артистердің кәсіби шеберлігін қажет ететін ауқымды жобалар мен жаңа жоспарлар күтіп тұр. Театрды құрметтер көрермен барда, театр қалтқысыз қызмет етуден жалықпайды. Жаңа маусымдағы жағымды жаңалықтар мен жаңа бастамалардың бізбен бірге куәсі болыңыз!

Жаңашылдыққа жаны құмар театр ұжымының жаңа маусының алғашқы көрерменінің бірі болуға асығыңыз.

Қойылымдар болатын күні, уақыты: 19, 20 қыркүйек, 18:30.