Жазылу
Гренландия мен Данияда Трамптың мәлімдемелеріне қарсы жаппай наразылық өтті
Гренландия мен Данияда мыңдаған адам АҚШ-тың президенті Дональд Трамптың Гренландияға қатысты даулы пікірлеріне қарсылық білдіріп, көшеге шықты. Наразылық акциялары Гренландияның астанасы Нуукта, сондай-ақ Данияның бірқатар қаласында, оның ішінде Копенгагенде ұйымдастырылды.
Шараларды гренландиялық және дат азаматтық қоғам ұйымдары өткізді. Қатысушылар Дания корольдігінің егемендігіне құрмет көрсетуді, сондай-ақ Гренландия халқының өзін-өзі анықтау құқығын мойындауды талап етті. Inuit қауымдастығының жетекшісі Камилла Сизингтің айтуынша, бұл акциялар сыртқы қысымға жол бермеу және аралдың болашағы гренландиялықтардың өз еркінде болуы керектігін көрсету мақсатында өтті.
Наразылыққа Дональд Трамптың бұрын айтқан мәлімдемелері түрткі болды. Ол Гренландияны АҚШ-тың ұлттық қауіпсіздігі үшін стратегиялық маңызы бар аумақ деп атап, тіпті қажет болған жағдайда күш қолдану мүмкіндігін де жоққа шығармаған. Бұған қоса, 17 қаңтарда Трамп өз жоспарына қарсы шыққан еуропалық елдерге экономикалық қысым жасауға дайын екенін айтып, сауда шектеулерін енгізу туралы ескерткен.
Бұл мәлімдемелер Еуропада алаңдаушылық тудырып, Гренландия мен Данияда қоғамдық наразылықтың күшеюіне себеп болды. Қатысушылар мұндай риторика халықаралық құқық қағидаттарына қайшы екенін айтып, саяси қысым мен қоқан-лоқыға қарсы екендерін ашық білдірді.
