Жазылу
Грузияда оппозиция жетекшісі Зураб Джапаридзе тұтқындалды
Тбилиси қалалық соты «Өзгерістер коалициясы» оппозициялық қозғалысының жетекшілерінің бірі Зураб Джапаридзені тұтқындау туралы шешім шығарды. Саясаткер 22 мамыр кешкісін сот залында қамауға алынды. Бұл туралы грузиндік ақпарат құралдары хабарлады.
Айыптау себебі – парламенттік комиссияға келмеуі
Джапаридзеге тағылған негізгі айып – Грузия парламентінің уақытша тергеу комиссиясының отырысына келуден бас тартуы. Бұған дейін сот оған 20 мың лари (шамамен 6400 еуро) көлемінде кепіл қарастырған еді. Алайда бейсенбідегі сот отырысында судья бұл шараны қамауға алмастырды.
Newsgeorgia басылымының хабарлауынша, сот отырысы Джапаридзені қолдаушылар мен полиция арасындағы қақтығыстармен өтті. Қарсыластар сот ғимаратының ішінде де, сыртында да наразылық білдірді. Көпшілік сот залына кіре алмады.
Айта кетерлігі, Джапаридзенің адвокаттары сот отырысынан наразылық белгісі ретінде шығып кеткен. Сот оларға мемлекеттік қорғаушы тағайындаудан да бас тартты.
Бір жылға дейін бас бостандығынан айырылуы мүмкін
Грузия Қылмыстық кодексінің 349-бабы бойынша, парламенттік уақытша комиссияның талабын орындамау – айыппұл немесе бір жылға дейін бас бостандығынан айыру жазасымен қарастырылады. Бұл комиссия «Грузин арманы» партиясының бастамасымен құрылған және оның мақсаты – 2003–2012 жылдар аралығындағы Михаил Саакашвили билігі кезеңіндегі «қылмыстарды» зерттеу.
Сотқа дейін Джапаридзе бұл тергеу комиссиясын жалған әрі заңсыз деп есептейтінін мәлімдеді. «Егер бәріміз өтірікке қатысудан бас тартсақ, бұл режим өздігінен құлайды», – деді ол «Азаттықтың» грузин қызметіне берген сұхбатында.
14 мамырда тағы бір оппозиционер ұсталған
Осыған ұқсас айыппен 14 мамыр күні Грузияның бұрынғы қорғаныс министрі Ираклий Окруашвили де тұтқындалған болатын. Ол да тергеу комиссиясына қатысудан бас тартып, кепіл төлемеген.
