Индонезияда жанартау атқылап, 10 мың адам зардап шекті

Левотоби Лаки-Лаки жанартауы 4 қараша күні кешке атқылап, күлі 2000 метр биікке ұшқан. Жанартаудың атқылауы салдарынан жақын маңдағы елді мекендерде өрт шыққан.

Франс Пресс агенттігінің хабарлауынша, кем дегенде бес ауылдың тұрғындары эвакуацияланған, жанартау маңындағы үйлерді қалың күл қабаты басып қалған.

Индонезияның табиғи апаттар агенттігінің (BNPB) өкілі Абдул Мухари жанартаудың атқылауынан 10 мыңнан астам азамат зардап шеккенін айтты. BNPB адамдарды жанартау кратерінен кемінде 7 шақырым қашықтықта тұруға шақырды.

Қазан айының соңында Индонезиядағы ең белсенді жанартаулардың бірі Марапи оянды. Шамамен 2,9 мың метр биіктікте орналасқан жанартау қаңтар айынан бері екінші ескерту деңгейінде тұр, лава атқылау қаупіне байланысты альпинистер мен жергілікті тұрғындарға кратерге 3 шақырымнан жақын баруға тыйым салынған.