Жазылу
Иран АҚШ-пен келіссөздер жүргізуден бас тартты
Иранның Жоғарғы ұлттық қауіпсіздік кеңесінің хатшысы Әли Лариджани ресми түрде АҚШ-пен ешқандай келіссөздер болмайтынын мәлімдеді.
Оның айтуынша, қазіргі жағдайда Вашингтонмен диалог орнату мүмкін емес. Лариджани АҚШ-тың Таяу Шығыстағы саясатын қатаң сынға алып, Дональд Трамп аймақта «хаос туғызып, тұрақсыздықты күшейтіп отыр» деп айыптады.
«Бұл саясат аймақ елдеріне тек шығын әкеледі. Біз ешбір жағдайда АҚШ-пен келіссөздер жүргізбейміз», - деді ол.
Айта кетейік, бұған дейін Трамп Иранның келіссөз жүргізуін сұрағанын мәлімдеген еді.
— Олар келіссөз жүргізгісі келеді, мен бұған келістім, — деді Трамп The Atlantic журналына берген сұхбатында.
Ол сондай-ақ Иран мұндай қадамдарға бұған дейін де бара алар еді деп атап өтті. Трамп келіссөздердің нақты қашан басталатынын нақтылаған жоқ, бірақ алдыңғы талқылауларға қатысқан кейбір ирандық шенеуніктердің соққылар кезінде қаза тапқанын айтты.
— Бұл адамдардың көпшілігі қазірдің өзінде қаза тапты. Олар бұған дейін келісуі керек еді. Мәмілеге келе алар еді. Бірақ тым айлакерлік жасады, — деді Трамп.
Ол АҚШ әрекеттері қауіпсіздікті қамтамасыз етуге және халықты қорғауға бағытталғанын айтты. Оның мәліметінше, операциялар барысында Иранның 48 көшбасшысы қаза тапқан, ал америкалық әскерилердің әрекеті «жоспардан озық» жүріп жатыр.
