Иран АҚШ-тың Таяу Шығыстағы одақтастарына ескерту жасады

Бұл туралы Reuters агенттігіне анонимді түрде пікір білдірген Иранның жоғары лауазымды өкілі хабарлады.

Оның айтуынша, Тегеран Сауд Арабиясы, Біріккен Араб Әмірліктері және Түркиямен байланысқа шығып, Вашингтонды Иранға шабуыл жасаудан тоқтатуды сұраған.

«АҚШ Иранға соққы берсе, Сауд Арабиясынан БАӘ мен Түркияға дейінгі елдер аумағындағы АҚШ базалары шабуылға ұшырайды», - деді дереккөз.

Ресми тұлға сондай-ақ Иранның сыртқы істер министрі Аббас Аракчи мен АҚШ президентінің арнайы өкілі Стив Уиткофф арасындағы тікелей байланыстардың тоқтатылғанын айтты. Бұл өңірдегі шиеленістің күшейгенін аңғартады.

Иран мемлекеттік БАҚ-тарының мәліметінше, елдің ең жоғары қауіпсіздік органын басқаратын Али Лариджани Катардың сыртқы істер министрімен сөйлескен. Ал Аббас Аракчи БАӘ мен Түркияның сыртқы істер министрлерімен байланыс орнатқан. Аракчи БАӘ сыртқы істер министрі Шейх Абдулла бин Заидке жағдайдың «бақылауда» екенін айтып, Иран кез келген сыртқы күштер ішкі мәселеге араласса егемендігі мен қауіпсіздігін қорғауға дайын екенін жеткізген.

АҚШ мәлімдемелерінен кейін

Бұл ескерту АҚШ президенті Дональд Трамптың Ирандағы наразылықтарға байланысты мәлімдемелерінен кейін жасалды. Трамп CBS News-ке берген сұхбатында егер Иран билігі наразылыққа шыққандарды қатаң жазаласа, «қатаң шаралар» қолданылуы мүмкін екенін айтқан. Ол сондай-ақ ирандықтарды наразылықты жалғастыруға шақырып, «көмек жолда» екенін мәлімдеді, бірақ егжей-тегжейін ашпады.

Осы тұста АҚШ Мемлекеттік департаменті америкалықтарды Ираннан шұғыл кетуге шақырды. 

Биньямин Нетаньяху басқаратын Израильдің қауіпсіздік кабинеті Ирандағы режимнің құлауы немесе АҚШ араласуы ықтимал деген сценарийлер жөнінде хабардар етілгені айтылады. Былтыр Израиль мен Иран арасында 12 күндік қақтығыс болған, оған АҚШ та қосылған. Кейін Иран АҚШ-тың ядролық нысандарға жасаған соққыларына жауап ретінде Ал-Удейд базасына зымыран атқан.

Қазір Иранда интернет толық өшірілген, сондықтан ақпарат ағыны шектеулі. АҚШ-та орналасқан құқық қорғау ұйымы осы уақытқа дейін 2 403 наразылыққа қатысушының және 147 үкіметке қатысты адамның қаза тапқанын растағанын хабарлады. Иранның ресми өкілі қаза тапқандар саны шамамен 2 мың екенін айтқан. 18 мыңнан астам адам ұсталғаны да белгілі болды.